Սնանկացման եզրին գտնվող Փայլակ Հայրապետյանը պայքարելու է, որ օֆշորային սկանդալի մեջ գտնվող, արդեն նախկին վարչապետ Տիգրան Սարգսյանն ու Արարատյան թեմի առաջնորդ Նավասարդ արքեպիսկոպոս Կճոյանը բանտ նստեն: Այս մասին NEWS.am-ին ասաց Փայլակ Հայրապետյանը:
«Այս ամեն ինչի գլխին կանգնած է Տիգրան Սարգսյանը: Չարիք, որ եկավ Հայաստանի գլխին: Նա պիտի հավաքարար լիներ, ոչ թե վարչապետ: Այդ գումարները տարել են օֆշոր, հետ բերել ու Հայաստանում 7,5 մլն դոլարի ոսկի գնել: Ում են տվել, ինչ են արել, ոչ մեկը չգիտի: Առանց «դակումենտի» Տիգրան Սարգսյանը 10 մլն 700 հազար է ուղարկել Աֆրիկա, իսկ ռիսկային գոտի համարվող երկիր գումար ուղարկելու համար Ազգային անվտանգության ծառայության, Ֆինանսների նախարարի, նույնիսկ երկրի նախագահի իմանալն է պարտադիր: Պայքարելու եմ մինչեւ վերջ: Տիգրան Սարգսյանն ու Նավասարդ Կճոյանը պիտի բանտ նստեն»,- ասաց նա:
78-ամյա գործարարի խոսքով՝ իրեն այս պահին բացի արդարությունից ոչինչ պետք չէ. «Ինձ պետք չի, բայց նա պետք է նստի բերդ, Աշոտը պիտի նստի, Կճոյանը պիտի նստի»:
Փայլակ Հայրապետյանը սպասում է, թե երբ են արտահանձնելու Աշոտ Սուքիասյանին, որպեսզի վերջինս պատմի, թե ում է տվել այդ գումարները: Այնուամենայնիվ, սնանկացման եզրին գտնվող գործարարը չգիտի՝ Սուքիասյանն իրական մեղավորների անուններ կտա, թե ոչ:
Նշենք, որ օֆշորային սկանդալում ներգրաված գործարար Աշոտ Սուքիասյանին փետրվարին հայտնաբերել են Թբիլիսում: Առաջիկայում նա կարտահանձնվի Հայաստան: Ավելի վաղ գործարարը նամակ էր ուղարկել ՀՀ գլխավոր դատախազ Աղվան Հովսեփյանին, իսկ պատճենը՝ «Հետքին», որտեղ գրել էր. «Ուզում եմ անդրադառնալ օֆշորային կազմակերպությանը` WLISPERA HOLDINGS LIMITED-ին: Նախ ասեմ, որ այս կազմակերպության հիմնադիրը ես եմ եւ ես եմ բաժնեմասեր գրել Տ. Սարգսյանի եւ Ն. Կճոյանի անուններով` առանց նրանց գիտության եւ առանց նրանց համաձայնության: Դա արել եմ, որպեսզի իմ բիզնեսը զերծ պահեմ տարբեր ոտնձգություններից: Չեմ գիտակցել, որ այն կարող է հետեւանքներ ունենալ»: Մինչեւ այդ «Հետքը» գրել էր, թե օֆշորային այդ կազմակերպության բաժնետերեր են Տիգրան Սարգսյանն ու Նավասարդ Կճոյանը:
Հիշեցնենք, որ դեռ 2009թ. էկոնոմիկայի նախարարության շենքում նախարար Ներսես Երիցյանի մոտ ՀՀ այդ ժամանակ վարչապետ Տիգրան Սարգսյանի գլխավորությամբ հանդիպում-խորհրդակցություն է կազմակերպվել 23 արդյունաբերական կազմակերպությունների ղեկավարների հետ, որի ժամանակ քննարկվել է Ռուսաստանի՝ Հայաստանին տրամադրված 500 միլիոն դոլարի վարկը, որից 100 միլիոնը Ռուսաստանը պետք է տար ապրանքային տեսքով՝ ադամանդի հումքով։ Իսկ այդ 100 միլիոնի վարկը պետք է բաժանվեր այդ 23 կազմակերպությունների միջեւ, որպեսզի դրանք սկսեն աշխատել։ Գործարար Փայլակ Հայրապետյանն առաջարկել է գրավադրել իր 33 մլն դոլար արժողությամբ իր ամբողջ անշարժ գույքը եւ «Ամերիաբանկը»-ից ստացված մոտ 10 միլիոն դոլարը տվել Աշոտ Սուքիասյանին, որն էլ վերցնելով գումարը՝ փախել է երկրից:
