Հայաստանում ԱՄՆ արտակարգ եւ լիազոր դեսպան Ջոն Հեֆերնը սիրում է ծագումով հայ ամերիկյան երգչուհի Շերի (Շերիլին Սարգսյան) արվեստը եւ երգերը, NEWS.am-ին հայտնել է դեսպան Ջոն Հեֆերնը: «Twitter»-ի իր էջում Հեֆերնը տեղադրել է 1967թ. շատ հին լուսանկար՝ Շերի մասնակցությամբ, որն արվել էր Բեւերլի Հիլզում: Լուսանկարը տեղադրելով՝ Հեֆերնը երգչուհուն կոչ է արել կրկին այցելել Հայաստան:
Նշենք, որ Շերլին Սարգսյանը եղել է Հայաստանում ղարաբաղյան պատերազմի առաջին տարիներին: Երգչուհին զարմացել էր, որ նման է բոլորին, եւ բոլորն՝ իրեն: «Ինձ համար դա բացահայտում էր. այո, ես իսկապես հայուհի եմ: Սակայն քանի դեռ ես այնտեղ չէի եղել, ես դա չէի զգում: Մեր բեռնատար օդանավը մարդասիրական օգնություն տեղ հասցրեց: Նրանք ցնցված էին, նրանք մնացել էին առանց ծածկի եւ սննդի: Հիանալի է, որ ես Հայաստան եկա եւ կարողացա օգնել մարդկանց», - այն ժամանակ ասել էր Շերը: