Ազգային ժողովի ԲՀԿ խմբակցության պատգամավոր Գուրգեն Արսենյանը, որն Իսպանիայի ազգային հավաքականի մոլի երկրպագու է, համոզված է, որ աշխարհի առաջնության մեկնարկային խաղում Իսպանիան «խայտառակ» պարտություն չի կրել: NEWS.am-ի հետ զրույցում պատգամավորը նշեց, որ այս խաղն ընդամենը գրանցվեց ֆուտբոլային պատմության մեջ:
«Ես չեմ ուզում այդ պարտությունը խայտառակ անվանել, որովհետեւ ֆուտբոլում խայտառակ բաներ չեն լինում, խայտառակ բաներ քաղաքականության մեջ են լինում: Սա սպորտային դիմակայություն էր, որտեղ մի թիմը կարողացավ մյուս թիմի չպլանավորած գործողությունների դիմաց կատարել ավելի ակտիվ, ավելի մտածված, ավելի սպորտային, ավելի արագ գործողություններ, եւ արդյունքում հասավ նման հաղթանակի: Այս խաղում գրանցված արդյունքն էլ մտավ ֆուտբոլի պատմության մեջ, վիճակագրության մեջ, ընդամենը սա»,- ասաց ֆուտբոլասեր պատգամավորը:
Նշենք, որ Հանրային հեռուստաընկերությամբ հարձակվող Իսպանիա-Նիդեռլանդներ խաղը մեկնաբանում էին հենց Գուրգեն Արսենյանն ու սպորտի նախկին նախարար Հրաչյա Ռոստոմյանը: Հարցին, թե հեշտությամբ քաղաքական գործիչը համաձայնվեց հանդիպում մեկնաբանել՝ ԲՀԿ-ական պատգամավորը պատասխանեց. «Իմ գործունեությունը չի սահմանափակվում միայն քաղաքականությամբ կամ պատգամավորի գործունեությամբ, ես սովորական մարդ եմ, որն ունի նախասիրություններ, մասնավորապես սպորտի նկատմամբ: Երբ ինձ հաճելի իրադարձություններ են տեղի ունենում եւ առաջարկ է լինում դրանց մասնակցելու, ինչո՞ւ պետք է հրաժարվեմ»:
Ի դեպ, խաղից հետո ֆուտբոլասեր հասարակությունը սոցկայքերում քննարկում էր պատգամավորի մեկնաբանած հանդիպումը:
Հիշեցնենք, որ Իսպանիան իր մեկնարկային խաղում 1:5 պարտվեց Նիդեռլանդներին: