2013թ. նոյեմբերի համեմատ Ադրբեջանում իրավապաշտպանների վիճակը կտրուկ վատացել է, հայտարարել է ԵԽԽՎ զեկուցող ԵԽ անդամ երկրների իրավապաշտպանների պաշտպանության հարցերով զեկուցող Մայլիս Ռեպսը։
Ըստ նրա՝ 2013 թ. նոյեմբերին Ադրբեջան կատարած իր այցից հետո իրավիճակն ավելի է վատացել: «Մշտապես խախտվում են հիմնական ազատությունները, եւ սարսափելին այն է, որ դա տեղի է ունենում այն ժամանակ, երբ Ադրբեջանը նախագահում է ԵԽ-ի Նախարարների կոմիտեում, կազմակերպություն, որը հիմնված է ժողովրդավարության, մարդու իրավունքների եւ օրենքի գերակայության վրա»,- հայտարարել է նա:
Զեկուցողը մտահոգություն է հայտնել իրավապաշտպանների, քաղաքացիական ակտիվիստների եւ բլոգերների դեմ ձեռնարկվող միջոցների կապակցությամբ: Ըստ նրա՝ այդ միջոցներն ազդում են նաեւ իր շատ ընկերների եւ գործընկերների վրա, ներառյալ՝ Լեյլա Յունուսին, Անար Մամեդլիին, Իլգար Մամեդովին:
Խորհրդարանականը հավելել է, որ քաղաքացիական հասարակության նկատմամբ ճնշումներն անընդունելի են, եւ կոչ է արել անմիջապես ազատել Իլգար Մամեդովին, Անար Մամեդլիին եւ նրա գործընկերներին: