ՌԴ ՊՆ-ն պայմանագիր է ստորագրել Բելառուսին զենիթային С-300 համալիրներ անհատույց տրամադրելու մասին, Մինսկում MILEX-2014 ցուցահանդեսում հայտարարել է Ռազմատեխնիկական համագործակցության դաշնային ծառայության փոխտնօրեն Կոնստանտին Բիրյուլինը, փոխանցում է ԻՏԱՌ-ՏԱՍՍ-ը:
Ըստ նրա՝ այս պահին պայմանագրին ծանոթանում է բելառուսական կողմը: Բիրյուլինը չի հստակեցրել, թե քանի С-300 են նվիրելու Բելառուսին:
Ռուսաստանը եւ Բելառուսը ՀՕՊ միասնական տարածաշրջանային համակարգի ձեւավորման համաձայնագիր էին ստորագրել 2009 թ. փետրվարին: Այս համակարգը պետք է կազմի ԱՊՀ ՀՕՊ Արեւելաեվրոպական գոտու հիմքը: 2012 թ. վերջին ծրագրվել էր կիրառել Ռուսաստանի եւ Բելառուսի միասնական ՀՕՊ-ի կառավարման թվային համակարգ, որի կառավարումն իրականացվելու է ավտոմատացված ռեժիմով:
Ավելի վաղ հայտնի էր դարձել, որ ռուս-բելառուսական միասնական ՀՕՊ համակարգում ընդգրկվելու են նաեւ С-400 եւ «Թոր-Մ2» զենիթահրթիռային համալիրներ, որոնք Բելառուսին են մատակարարվելու արտոնյալ պայմաններով: Ռուսաստանի ԶՈՒ-ի գլխավոր շտաբը կարծում է, որ ՀՕՊ համակարգը С-400 16 դիվիզիայի կարիք ունի: Այդ քանակությունն անհրաժեշտ է Արեւմուտքի թեւավոր հրթիռներից պաշտպանվելու համար:
