Գերմանացի գիտնականները մարդու մաշկի վրա հոտառական ընկալիչներ են հայտնաբերել, որոնք որոշ հոտերի հետ շփվելիս ստիպում են բջիջներին տրոհվել եւ տարածվել(այդ կերպ են վերքերը վերականգնվում):
Մարդու քթի մեջ նմանատիպ ավելի քան 350 ընկալիչ կա, որոնք տարբեր բույրեր են ընկալում: Նմանատիպ բջիջներ կան ներքին օրգաններում(սիրտ, լյարդ, աղիքներ), սակայն գտնել եւ ուսումնասիրել դրանք բավական բարդ է: Ուստի Բոհումում գտնվող Ռուրի համալսարանից Հանս Հաթի լաբորատորիայում որոշել են ուսումնասիրել, թե ինչպես են հոտերին արձագանքում կերատինոցիտները՝ բջիջներ, որոնք մաշկի վերին շերտի հիմնական մասն են կազմում:
Գիտնականները պարզել են, որ սանդալորի բույրը կապված է «OR2AT4» ընկալիչի հետ: Սակայն այն, ի տարբերություն քթի հոտառական ընկալիչների, ուղեղին ազդակներ չի ուղարկում, այլ ստիպում է կերատինոցիտներին տրոհվել ու տարածվել: Ուստի հենց այդ գործընթացների շնորհիվ վերականգնվում է վնասված մաշկը, հաղորդում է «Lenta.ru»-ն:
Բջիջների եւ սանդալորի շփման շնորհիվ հինգ օրվա ընթացքում տրոհման արագությունը 32 տոկոսով աճել է, իսկ տարածման արագությունը՝ մոտ երկու անգամ:
Ինչպես նշվում է, հոտառական 150-200 ընկալիչ, որոնք հայտնաբերվել են քթից դուրս, մեծ հնարավորություններ են տալիս բժշկական փորձերի համար: