Վրաստանից Հայաստան ներմուծվող մեքենաների մաքսազերծումն առաջիկա 5-10 տարիներին չպետք է թանկանա: Այս մասին NEWS.am-ի թղթակցի հետ զրույցում հայտարարեց մանրածախ ավտոներմուծողներին միավորող «Ավտոներմուծողների պաշտպանության լիգա» ՀԿ նախագահ Տիգրան Հովհաննիսյանը: Նրա խոսքով, ավտոներմուծողները չեն կասկածում. ամեն ինչ կլինի այնպես, ինչպես մեկ ամիս առաջ Հանրային հեռուստաալիքի եթերում հայտարարեց ՀՀ նախագահ Սերժ Սարգսյանը:
Ըստ Հովհաննիսյանի, հուսադրող է, որ մեկնաբանելով Եվրասիական միությանը Հայաստանի անդամակցության շուրջ բանակցությունները՝ նախագահը խոսեց հենց ավտոմեքենաների ներմուծման պայմանների մասին:
Հիշեցնենք, որ հունիսի 17-ին Հայաստանի Հանրային հեռուստաալիքին տված հարցազրույցում նախագահ Սերժ Սարգսյանը հայտարարեց, որ Եվրասիական տնտեսական հանձնաժողովի հետ բանակցություններում թեմաներից մեկը մաքսատուրքերի դրույքաչափերի, մասնավորապես՝ ավտոմեքենաների մաքսազերծման հարցն է: Հայաստանում այդ մաքսատուրքն ավելի ցածր է, քան Եվրասիական միությունում, սակայն Հայաստանը խնդրել է այդ դրույթի կիրառումը հետաձգել 5-10 տարի, եւ Միության անդամ երկրները հարգել են հայկական կողմի խնդրանքը: