Բուենոս-Այրեսում կայացել է «Armenia Corre» հինգերորդ վազքը: Prensa Armenia-ն հայտնում է, որ Հայ մարմնակրթական ընդհանուր միության՝ «Հոմենեթմենի» կազմակերպած 3 եւ 8 կմ-անոց վազքին, որը նվիրված էր Հայոց ցեղասպանության 99-րդ տարելիցին, մասնակցել են տարբեր տարիքային խմբերի ավելի քան 2500 մասնակիցներ: Վազքը բոլորի համար էր, ոչ միայն արգենտինահայերի, եւ շատերը մասնակցության շնորհիվ իմացան Հայաստանի պատմությունը:
Հայ մարմնակրթական ընդհանուր միության փոխնախագահ եւ վազքի կազմակերպիչներից մեկը հանդիսացող Հորասիո Թերզյանը բացատրեց, որ «Հայաստանը վազում է հանուն ազատության եւ հիշատակի» կարգախոսը նշանակում է, որ չնայած պատմական բոլոր դեպքերին՝ նրանք չկարողացան կոտրել մեզ, եւ այսօր նախկինի պես մենք կանգուն ենք եւ առաջ ենք գնում: