Սեւանա լճում ձկնաբուծարանը կօգնի իշխանի սերունդների մաքրությանը, հուլիսի 18-ին լրագրողներին ասել է ՀՀ ԳԱԱ Հիդրոէկոլոգիայի եւ ձկնաբանության ինստիտուտի տնօրեն Բարդուղ Գաբրիելյանը: Նա հիշեցրել է, որ գործարանը կպարտավորվի լիճը համալրել իշխանով, իսկ բնապահպանության նախարարության համար ավելի հեշտ կլինի հետեւել մեկ գործարանի մանրաձկներին, քան թե տասնյակ ձկնաբուծական ընկերությունների:
Այժմ իշխանի սերնդատվության վերականգնման պետական ծրագրով լիճ են բաց թողնվում Արարատյան դաշտի, Ջերմուկի, Սիսիանի ջրային տնտեսություններից մրցույթով գնված մանրաձկներ: Սակայն այդ վիճակում դժվար է որոշել՝ Սեւանի իշխան է, թե ոչ: «Մրցույթի ժամանակ դա ոչ ոք չի ստուգում: Իսկ այստեղ ձկնատեսակը ստուգվելու է, եւ մանրաձկները վերցվելու են միայն գործարանից: Եթե ամեն ինչ լինի, ինչպես թղթում է, ապա դա հուսադրող է», - ասել է Գաբրիելյանը:
Նա հիշեցրել է, որ խորհրդային տարիներին նույն պրակտիկան էր գործում. ձկնորսությունը եւ մանրաձկների լցոնումն իրականացնում էր պետձեռնարկությունը: Լճից դուրս էին բերվում ձկների էգերը, նրանց խավիարը բեղմնավորվում էր գործարանում եւ բաց թողնվում լիճ: Գաբրիելյանը հավելել է, որ վատ չէր լինի վերածնել այդ ավանդույթը: «Եթե ձուկը բազմացնի մասնավոր անձը, վաղը կարող է որոշել, որ իր համար ձեռնտու է, ասենք, ոչ թե իշխանը, այլ մեկ այլ բան: Այդ ժամանակ մենք կկորցնենք մեր իշխանի էնդեմիկ տեսակները: Իսկ պետությունը հաշվետու լինելու իմաստով հուսալի է»:
Հիշեցնենք, ծրագիրը, որը նախատեսվում է իրականացնել պետություն-մասնավոր հատված գործընկերությամբ, նախատեսում է լճում իշխանի քանակը հասցնել տարեկան մինչեւ 50 հազար տոննայի՝ 10 տարվա ընթացքում (մինչեւ 2023 թ.): Լճում ձկնատեսակները պահպանելու համար՝ նախատեսվում է բազմացվող մեծ ձկների 1,5% -ը բաց թողնել լիճ: