Ռուսաստանի Տյումեն քաղաքում ապրիլի 21-ին սեփական բնակարանում դանակի 40 հարվածից սպանված 26-ամյա Նունե Սարգսյանի սպանության մեջ մեղադրվող պիցցայի առաքիչ, 22-ամյա տյումենցի Զախար Կովրիգինը հոգեկան շեղումներ չունի. դատաբժշկական փորձաքննությամբ է դա պարզվել, ինչն էլ նշանակում է, որ Զախարը գործել է գիտակցաբար: Այս մասին NEWS.am-ի հետ զրույցում ասաց սպանվածի ամուսինը՝ Արամ Ապրեսյանը:
«Նախաքննությունը դեռ շարունակվում է. միակ նորությունն այն է, որ էդ տղան պարզվել է, որ հոգեկան խնդիրներ չունի, մեղսունակ է, այնպես որ պատժից խուսափել չի կարող: Ստացել ենք նաեւ մի քանի այլ փորձաքննությունների պատասխաններ, որոնք մեզ համար այնքան էլ կարեւոր չեն: Գտել են նաեւ մարդասպանի կոշիկները, հագուստը, որի վերաբերյալ այս պահին դատաբժշկական փորձաքննություն է նշանակվել՝ պարզելու համար դրանց վրա Նունեի արյան հետքերը կան, թե ոչ: Իսկ մենք սպասում ենք Նունեի մատրի եղունգի տակից վերցրած փորձաքննության արդյունքներին, մեզ համար այս պահին սա է կարեւոր»,- ասաց նա:
Արամ Ապրեսյանի խոսքով՝ իրենք մտավախություն ունեն, որ նախաքննությունը դեռ երկար կտեւի, քանի որ ամեն մի փորձաքննության արդյունք ստացվում է 2-3 ամիս անց:
«Հիմա էդ եղունգի տակից վերցրած փորձաքննության արդյունքները դեռ չենք ստացել, որովհետեւ ասում են՝ ծանրաբեռնված են աշխատում: Վախենամ, որ գործը դատարան գնա ամիսներ հետո»,- ավելացրեց նա:
Ավելի վաղ NEWS.am-ը հայտնել էր, որ որ Տյումենում սարսափելի սպանություն է կատարվել: Պիցցայի առաքիչ 22-ամյա տյումենցի Զախար Կովրիգինը Նունեի պատվերն առաքելիս որոշել է տիրանալ աղջկա ունեցվածքին: Կովրիգինը դանակ է հանել եւ բռնություն գործադրելու սպառնալիքով պահանջել, որ աղջիկը իրեն հանձնի ձեռքի տակ եղած ողջ գումարն ու արժեքավոր իրերը: Ստանալով պահանջվածը` ոսկե մատանիներ եւ գումար, չարագործը, մտավախությամբ, որ տուժողը տեղի ունեցածի մասին կհայտնի իրավապահ մարմիններին, նրան դանակի առնվազն 40 հարված է հասցրել: Հարուցվել է քրեական գործ: