Ամերիկյան Քենթուկի նահանգում մի տղամարդ, ում մեղադրանք են առաջադրել խանութից գարեջուր գողանալու համար, իր մեղքերին եւս մեկն է ավելացրել. նա ոստիկանությունից ռեստորան է զանգահարել՝ 5 պիցցա պատվիրելու համար:
Reuters-ի փոխանցմամբ, 29-ամյա Մայքլ Հարփը ձերբակալվել է խանութում գողություն կատարելու համար: Նա եւ մյուս կասկածյալները միեւնույն խանութից նույն օրը մեկից ավելի անգամներ գարեջուր են գողացել եւ բռնվել այն հասարակական վայրում խմելու ժամանակ:
Ոստիկանության բաժանմունքում Հարփը հարցրել է, արդյո՞ք կարելի է իր բջջային հեռախոսով զանգահարել ընտանիքի անդամներին: Թույլտվություն ստանալուց հետո նա զանգահարել է ռեստորան եւ իրեն ձերբակալած կապիտան Քոյ Ուիլսոնի անունից պիցցա պատվիրել: Դրանից հետո երիտասարդին մեղադրանք են առաջադրել ոչ միայն գողության, այլեւ անձնական տվյալներ հափշտակելու եւ որպես ոստիկան ներկայանալու համար:
