«Օրինաց երկիր» կուսակցությունն այսօր՝ հուլիսի 18-ին, էլեկտրաէներգայի թանկացման դեմ նախաձեռնած հանրահավաքի ժամանակ նախատեսել էր ավելի շատ ելույթներ, սակայն հաշվի առնելով, որ այսօր ամենաշոգ օրն է, ամենաշատը խոսելու է ՕԵԿ նախագահ Արթուր Բաղդասարյանը։
Չնայած հանրահավաքը նախատեսված էր ժամը 18:30-ին, այն սկսվեց ավելի քան 40 րոպե ուշացումով։ Առաջինը ելույթ ունեցավ ՕԵԿ փոխնախագահ, խմբակցության պատգամավոր Հեղինե Բիշարյանը, որը հայտարարեց, որ իրենք միշտ էլ պայքարել են օլիգարխիայի դեմ։
«Եթե մենք այսօր չփակենք մեր գրպանը եւ ժուլիկին ցույց չտանք իր տեղը, ապա մենք արդյունքի չենք հասնի եւ մշտապես կբողոքենք միայն։
Մենք հավատարիմ ենք մնացել մեր առաքելությանը։ Մենք պայքարել ենք ավանդների վերադարձման, մանկապարտեզի, դպրոցի, բուհի համար, պայքարել ենք փոքր եւ միջին բիզնեսի համար։ Որքան էլ որոշ մարդիկ լցված են ՕԵԿ նախագահ Արթուր Բաղդասարյանին սեւ փիառ անելով, ի հեճուկս նրանց՝ ձեր ներկայությունը եւս մեկ անգամ ապացուցում է, որ մենք չենք սխալվել»,- ասաց նա։
Հեղինե Բիշարյանի խոսքով՝ իրենք նույնիսկ ազնիվ են իրենց սխալների մեջ, երբեք չեն չարախոսել՝ ի տարբերություն այլ մարդկանց։
«Ուզում եմ հավաստիացնել, որ հաղթելու ենք մեր տեսակով, մեր համոզմունքներով, շարունակելու ենք հավատարիմ լինել մեր դավանած սկզբունքներին»,- ավելացրեց նա։
Նշենք, որ Հովիկ Աբրահամյանի վարչապետ նշանակվելուց հետո ՕԵԿ-ը դուրս եկավ կոալիցիայից եւ դարձավ ընդդիմություն։
