Ազգային ժողովի ՕԵԿ խմբակցությունը պատրաստվում է օրենք մշակել, որը կկոչվի «Կշտանալու մասին օրենք»։ Այս մասին այսօր՝ հուլիսի 18-ին, էլեկտրաէներգիայի թանկացման դեմ նախաձեռնած հանրահավաքի ժամանակ ասաց ՕԵԿ փոխնախագահ Հովհաննես Մարգարյանը։
«Երեկ մի խեղճ ուսուցչուհի խնդրում էր ինձ բանկից հանել գումարը, սակայն ասում եմ՝ մայրիկ, Ձեր հաշիվները սառեցված են, եւ այս ուսուցչուհին, որ հարյուր հազար դրամով ապրում է, պետք է հիմա էլ հինգ հազարի պատճառով զրկվի այդ գումարից։ Ուզում են շքեղության հարկ մտցնել, այո թող մտցնեն։ Շքեղ ապրողը թող հարկը վճարի, իսկ աղքատ մարդն էլ իր ապրուստը կհոգա։ Իսկ ես իմ գործընկերների հետ պատրաստվում ենք նոր օրենք մշակել, որը կկոչվի «կշտանալու մասին» օրենք,- ասաց նա։
Նշենք, որ այս պահին Ազատության հրապարակում շարունակվում է ՕԵԿ-ի հանրահավաքը, որի հիմնական նպատակը էլեկտրաէներգիայի թանկացման դեմ պայքարն է։ Հիշեցնենք, որ օգոստոսի մեկից էլեկտրաէներգիան կթանկանա տասը տոկոսով։