Ազատագրված Քարվաճառում համակարգիչ ունենալն անիմաստ գումարի վատնում է, քանի որ ինտերնետն այս շրջանում երազանքի է նման. համացանցը հասանելի է միայն բանկերում եւ վարչական շենքերում, իսկ երիտասարդներին երբ հարցնում ես, թե ինչի մասին են երազում, միանգամից ստանում ես պատասխան՝ «ինտերնետի»:
NEWS.am-ի հետ զրույցում քարվաճառցի 15-ամյա Անին անկեղծանում է եւ պատմում, որ ինտերնետից օգտվում է միայն Երեւան գալիս կամ Ստեփանակերտում:
«Մեզ մոտ զբաղմունք չկա, դասերից հետո, արձակուրդներին ոչ մի զբաղմունք չունենք, գոնե ինտերնետ լիներ, կմտնեինք, գրքեր, նորություններ կկարդայինք, կամ գոնե դասերի ժամին լրացուցիչ բան կսովորեինք: Հիմա եթե ես ուզեմ ինտերնետով կամ համակարգչով որեւէ բան անել, պետք է գնամ Ստեփանակերտ, որն էլ 130 կիլոմետր հեռու է մեզնից»,- ասում է Անին:
Տպավորություն է, որ այս շրջանում ինտերնետով չապահովելը պետական ծրագիր է: Շատ հեշտությամբ կարելի է Լաչինի շրջանում տեղադրել մեծ տիրույթ ընդգրկող աշտարակ եւ Քարվաճառում համացանցն այլեւս խնդիր չի լինի: Տարիներ առաջ Վիվասել-ՄՏՍ ընկերությունը Գորիսում տեղադրել էր այնպիսի սարք, որի կապից օգտվում էին նույնիսկ Լեռնային Ղարաբաղի հանրապետությունում: Սակայն հետո չգիտես թե ինչու՝ Վիվասել-ՄՏՍ-ն իր հաճախականությունը թուլացրեց, որից հետո էլ արդեն քարվաճառցիները մնացին ղարաբաղյան ընկերությունների հույսին: Մասնագետների պնդմամբ՝ Քարվաճառի ամբողջ տարածքում կապ ապահովելու համար անհրաժեշտ է ընդամենը 20-25 հազար դոլար:
NEWS.am-ը կապ հաստատեց ղարաբաղյան երկու օպերատորների՝ «Ղարաբաղ Տելեկոմ»-ի եւ «Արմինկո MK»-ի հետ, որոնք էլ ըստ երեւույթին ինտերնետ հասանելիություն են ապահովում ամբողջ շրջանում:
«Արմինկո MK»-ի գլխավոր տնօրեն Սամվել Մաիլյանը մեզ հետ զրույցում նշեց, որ իրենք ինտերնետով ապահովում են միայն Քարվաճառ քաղաքն ու եւս մեկ գյուղ:
«Պետությունը գոնե փորձի օգնել մեզ, աջակցի, անհնար է, դեռ մի բան էլ խանգարում է. երեւի թե հետաքրքրություն չունեն, որ Լեռնային Ղարաբաղում մարդիկ զարգանան: Իսկ ընդհանրապես մեր քաղաքականությունն է՝ ինտերնետ ապահովել այն վայրերում, որտեղ առնվազն 40-50 տուն կա: Սա նշանակում է, որ միայն քաղաքին եւ եւս մեկ գյուղի ենք ինտերնետ տալիս, այն էլ 2 մբ արագությամբ եւ 4000 դրամ արժողության: Սակայն հիմա նախատեսում ենք գոնե Դադիվանքում էլ ինտերնետ ապահովել, քանի որ տուրիստական գյուղ է»,- ավելացրեց Սամվել Մաիլյանը:
«Ղարաբաղ Տելեկոմ»-ից NEWS.am-ին հրաժարվեցին որեւէ տեղեկություն տալ՝ նախ խնդրելով հարցերը գրավոր ուղարկել, այնուհետեւ էլ խոստանալով մեկ շաբաթից ուղարկել հարցման պատասխանը:
Նշենք, որ Քարվաճառում կա բնակեցված 16 գյուղ: