Ռուսաստանում հուլիսի 17-ին տեղի ունեցած ողբերգական ավտովթարից զոհված 6 հայ քաղաքացիների դիակները Հայաստան տեղափոխելու մասին դեռ խոսք չկա, քանի որ քննություն է ընթանում: Այս մասին NEWS.am-ի հետ զրույցում ասաց ՌԴ-ում ՀՀ դեսպանության խորհրդական Էդվարդ Ջամբազյանը:
«Մեր ուշադրության կենտրոնում է հարցը, բայց դիակները Հայաստան բերելու մասին խոսք չկա, այդքան էլ հեշտ չէ, քանի որ քննություն է ընթանում, բայց դեսպանությունն ամեն ինչ անում է, որ հարցը լուծվի: Հիվանդանոցն էլ անհրաժեշտ օգնությունն է ցուցաբերում վիրավորներին»,- ասաց նա:
Նշենք, որ վթարի ենթարկվածները մի ընտանիքի անդամներ էին, բնակվում էին Երեւանի կենտրոնում:
Ավելի վաղ NEWS.am-ը, հղում անելով ԱԻՆ-ին, հայտնել էր, որ հուլիսի 17-ին ողբերգական ավտովթար է տեղի ունեցել Ռուսաստանի Դաշնությունում. Վթարի հետեւանքով տեղում մահացել էին Հայաստանի քաղաքացիներ Անի (ծնվ.1991 թ.), Արսեն (ծնվ.1957 թ.), Հմայակ (ծնվ.1989 թ.), Ազատ Թովմասյանները (ծնվ.1988թ.) եւ Ազոկիկ Ավանեսյանը (ծնվ.1959թ.), իսկ տուժածներ Հասմիկ (ծնվ.1996 թ.), Արսեն (ծնվ.2011 թ.), Արմեն Թովմասյանները (ծնվ.2012թ.) եւ Հասմիկ Ավանեսյանը (ծնվ.1994թ.) տարբեր մարմնական վնասվածքներով տեղափոխվել են Նիկալաեւսկի շրջանի կենտրոնական ԲԿ, որտեղ Հասմիկ Ավանեսյանը մահացել է, իսկ Արսեն եւ Արմեն Թովմասյանների առողջական վիճակը գնահատվել է ծանր, իսկ` Հասմիկ Թովմասյանինը` բավարար: