Հայաստանի պաշտպանության նախարար Սեյրան Օհանյանի խոսքերին միայն կարելի է սատարել, հուլիսի 19-ին լրագրողներին հայտնել է Երեւանի ավագանու «Բարեւ, Երեւան» խմբակցության անդամ Դավիթ Սանասարյանը։ Ըստ նրա՝ Հայաստանը արտաքին անվտանգության պաշտպանության գործում չպետք է ապավինի այլ ուժերին՝ լինի Ռուսաստանը, թե Արեւմուտքը։
«Ինձ բնավ դուր չի գալիս, երբ ասում են, որ մեր երկրի ապագան ինչ-որ մեկի ձեռքում է։ Երեկ կարդացի Սեյրան Օհանյանի հայտարարությունը, որ Հայաստանն ընդունակ է ապահովել իր անվտանգությունը՝ առանց որեւէ արտաքին ուժի։ Ինձ շատ դուր եկան խոսքերը, ես համամիտ եմ դրանց»,- հայտարարել է Սանասարյանը։
Ըստ նրա՝ երկար տարիներ Հայաստանը բանակցություններ էր վարում մադրիդյան սկզբունքների մասին, որոնք անընդունելի են հայ ժողովրդի համար. դրանցում խոսվում է ԼՂՀ շրջակա յոթ տարածքների վերադարձման եւ խաղաղապահների տեղակայման մասին։ «Այնուամենայնիվ, բանակցություններում մեզ պարտադրում են այս սկզբունքները։ Եվ այստեղ ոչ թե արտաքին ուժերն են մեղավոր, այլ ՀՀ իշխանությունները, որոնք ի վիճակի չեն ինչ-որ բանի վրա ազդելու», - հայտարարել է Սանասարյանը։
