ԱՄՆ Հետաքննությունների դաշնային բյուրոն (ՀԴԲ) վստահ է, որ ինքնակառավարվող ավտոմեքենաները, որոնց ուղղությամբ հիմա աշխատում են բազմաթիվ ավտոարտադրողներ, կարող են ապագայում հանգեցնել հանցագործության եւ ահաբեկչական գործողությունների աճին:
Ամերիկացիների կարծիքով, հիմա ինքնակառավարվող ավտոմեքենաները բավական անվնաս են թվում: Սակայն հետագայում դրանք կարող են զարգանալ եւ «մահացու զենք» դառնալ: Օրինակ՝ ահաբեկչական ակտ իրականացնելու համար մարդն այլեւս կարիք չի ունենա մահապարտ դառնալ: Հարկավոր կլինի միայն մեքենային ասել՝ ուր ուղեւորվել, եւ հանգիստ թաքնվել: Այս մասին գրում է The Guardian-ը՝ հղում կատարելով ՀԴԲ-ի զեկույցին:
Բացի այդ, հետապնդվող ավտոմեքենայի վարորդը կկարողանա միացնել ինքնակառավարման համակարգը եւ կրակել հետապնդողների ուղղությամբ, ինչը հիմա բավական դժվար է անել:
Մյուս կողմից, ՀԴԲ-ում նշում են, որ ինքնակառավարվող մեքենաների զանգվածային շահագործումը թույլ կտա զգալիորեն կրճատել ՃՏՊ-ների թիվը, քանի որ այդ դեպքում, այսպես կոչված, «մարդկային գործոն»-ը կբացակայի: Հենց այդ պատճառով էլ, ըստ Росбалт-ի, ՀԴԲ-ում կարծում են, որ ամերիկյան Կոնգրեսն առաջիկա 5-7 տարիների ընթացքում, ամեն դեպքում, կթույլատրի ընդհանուր օգտագործման ավտոճանապարհներին ինքնակառավարվող ավտոմեքենաների շահագործումը:
