Մահվան ելքով վրաերթ կատարած ավտոմեքենայի վարորդը ներկայացել եւ խոստովանել է իր հանցանքը:
Ավելի վաղ NEWS.am-ը հայտնել էր, որ հուլիսի 18-ին, ժամը 13.45-ին, «Մերսեդես Բենց» մակնիշի, առանց համարանիշի ավտոմեքենայի վարորդը Երեւանի Գարեգին Նժդեհի փողոցի թիվ 32 շենքի դիմաց վրաերթի էր ենթարկել 37-ամյա Սարգիս Ռաֆայելյանին, որը ուժգին հարվածից շպրտվել եւ ընկել էր «Օպել» մակնիշի ավտոմեքենայի վրա:
Ա. Ռաֆայելյանը հիվանդանոց տեղափոխվելու ճանապարհին մահացել էր:
Նույն օրը, ժամը 16.30-ին, ճանապարհային ոստիկանության ճանապարհատրանսպորտային հանցագործությունների քննության բաժին էր ներկայացել 45-ամյա Կարեն Պ.-ն եւ հայտնել, որ վրաերթը, «Մերսեդես Բենց» մակնիշի ավտոմեքենայով, կատարել է ինքը:
Ոստիկանության ծառայողների ձեռնարկած հետագա միջոցառումների արդյունքում` հուլիսի 19-ին, ժամը 13.45-ին, ճանապարհային ոստիկանության ճանապարհատրանսպորտային հանցագործությունների քննության բաժին է ներկայացել 38-ամյա Հայկ Գ.-ն եւ հայտարարել, որ իր անձնական օգտագործման «Մերսեդես» մակնիշի ավտոմեքենայով ինքն է վրաերթի ենթարկել Ս. Ռաֆայելյանին, որին շտապօգնության ավտոմեքենայով ուղեկցել է «Էրեբունի» բժշկական կենտրոն:
Պարզվել է, որ դեպքի ժամանակ ավտոմեքենայի վրա տեղադրված են եղել այլ համարանիշեր:
Քննությունը շարունակվում է: