ԲՀԿ առաջնորդ Գագիկ Ծառուկյանը պատրաստ է անհրաժեշտության դեպքում իրավական աջակցություն ցուցաբերել Մոսկվայում հուլիսի 15-ին կալանավորված Լեւոն Հայրապետյանին: Այս մասին NEWS.am-ի հետ զրույցում ասաց ԲՀԿ առաջնորդի մամուլի խոսնակ Իվետա Տոնոյանը՝ պատասխանելով այն հարցին, թե ինչպես է վերաբերվում Գագիկ Ծառուկյանը ծնունդով արցախցի գործարարի ձերբակալությանը:
«ԲՀԿ ղեկավարը բարձր է գնահատում Լեւոն Հայրապետյանի մարդասիրական գործունեությունը Հայաստանում ու Արցախում, եւ գտնում է, որ ՀՀ իշխանությունները պետք է անեն հնարավորը՝ պետական խողովակներով իրականությունը պարզելու համար։ Իր կողմից Գագիկ Ծառուկյանը պատրաստ է, անհրաժեշտության դեպքում, ցուցաբերելու ցանկացած օգնություն՝ Լեւոն Հայրապետյանի իրավական աջակցության համար»,- ասաց Իվետա Տոնոյանը։
Նշենք, որ Լեւոն Հայրապետյանի եղբայրը պնդում է, որ սա քաղաքական հաշվեհարդար է, իսկ հետեւում էլ կանգնած է Ադրբեջանը:
Հիշեցնենք, որ Ռուսաստանի Քննչական կոմիտեն Լեւոն Հայրապետյանին մեղադրանք է առաջադրվել երկու հոդվածներով` ՌԴ քրեական օրենսգրքի 160-րդ (վատնում) եւ 174-րդ (հանցավոր ճանապարհով ստացված եկամուտների օրինականացում) հոդվածներով: Նա կալանավորված է: