Մալայզիական ինքնաթիռի կործանման վայրում զոհերի որոնողական աշխատանքներն ավարտվել են: Այս մասին հայտարարել է Ուկրաինայի փոխվարչապետ Վլադիմիր Գրոյսմանը: Նրա խոսքով, գտնված մարմինները Խարկով են ուղարկելու արդեն այս երեկոյան: Գրոյսմանը նաեւ տեղեկացրել է, որ որոշվել է արագացնել նաեւ մարմինները Հոլանդիա տեղափոխելու համար անհրաժեշտ փաստաթղթերի ձեւակերպումը: «Օրենսդրության համաձայն, մենք որոշեցինք ողբերգության պատճառները պարզելու գործառույթը փոխանցել հոլանդացի գործընկերներին եւ այլ երկրների, որոնք ցանկություն են հայտնել մասնակցել հետաքննությանը»,- հավելել է Գրոյսմանը:
Ավելի վաղ NEWS.am-ը տեղեկացրել էր, որ մալայզիական Boeing 777-ի կործանման վայրում 282 դիակ եւ 87 մաս են հայտնաբերել:
Հիշեցնենք, որ Ամստերդամից Կուալա-Լումպուր ուղեւորվող մալայզիական ավիաուղիներին պատկանող Boeing 777-ի կործանման արդյունքում զոհվել են օդանավում գտնվող բոլոր 298 ուղեւորներն ու անձնակազմի անդամները: Ուկրաինայի ՆԳՆ-ն հայտարարել է, որ ինքնաթիռը, ամենայն հավանականությամբ, հարվածել են «Բուկ» զենիթա-հրթիռային համալիրից: