Թուրքիայում գիշերն անցկացված ընդգրկուն գործողության արդյունքում ապօրինի գաղտնալսման մեջ կասկածվող 55 ոստիկանի են ձերբակալել, այդ թվում՝ շրջանային վարչությունների անվտանգության, հետախուզական տվյալների հավաքման, հակաահաբեկչական գործունեության եւ ֆինանսական բաժինների ղեկավարներին: Գործողություն անցկացվել է երկու փուլով՝ 25 նահանգներում միաժամանակ, հայտնում է ԻՏԱՌ-ՏԱՍՍ-ը՝ վկայակոչելով տեղի հեռուստատեսությունը:
Ձերբակալություններն իրականացրել է անվտանգության գլխավոր վարչության ահաբեկչության դեմ պայքարի բաժինը: Միայն Ստամբուլում հսկողության տակ է առնվել 30 մարդ: Հաղորդվում է, որ հատուկ գործողության համար հիմք է հանդիսացել Թուրքիայի քաղաքացիների, այդ թվում՝ կառավարության անդամների հեռախոսները գաղտնալսելու մասին տեղեկատվությունը: Գաղտնալսմամբ զբաղվել են ոստիկանության ներսում գործող գաղտնի «Սելյամ Թաուհիդ» կազմակերպության անդամները: Այս կառույցը կասկածվում է 2,2 հազարից ավելի մարդու խոսակցությունները ձայնագրելու մեջ, որոնց թվում կան քաղաքական գործիչներ, լրագրողներ եւ ակադեմիական շրջանակների ներկայացուցիչներ:
Ձերբակալվածները կասկածվում են մասնավոր կյանքի գաղտնիքը, նախաքննական գաղտնիքը եւ անձնական գույքի անձեռնմխելիությունը խախտելու, պաշտոնական փաստաթղթերը եւ հանցանշանները կեղծելու մեջ:
