Երեւանում տրասնպորտի զարգացման համար անհրաժեշտ է շահագործել էլէկտրատրանսպորտ: Այս մասին այսօր՝ հուլիսի 22-ին, լրագրողների հետ զրույցում ասաց Սպառողների ասոցիացիայի նախագահ Արմեն Պողոսյանը՝ անդրադառնալով Երեւանում տրասնպորտի խնդիրներին, մասնավորապես, միկրոավտոբուսների գերծանրաբեռնվածությանը:
«Ավիացիայում գոյություն ունի անվերադարձելիության կետ, որից հետո վերադարձ չկա, մենք այդ կետը վաղուց անցել ենք: Մենք ականատես ենք էլեկտրատրանպորտի մահվանը՝ տրոլեյբուսները վերջին մեքենաներն են, որոնք շուտով չեն լինի: Եւ դրանք վերանում են, քանի որ դա կամային որոշում է, ոչ թե մրցակցության հետեւանք»,- նշեց Արմեն Պողոսյանը:
Արմեն Պողոսյանի խոսքով՝ Երեւանում տրոլեյբուսների երթուղին միտումնավոր սխալ են նախագծել. «Այն մարդը, որ նախագծել է տրոլեյբուսի երթուղին եւ պարբերականությունը, հանցավոր ձեռք ունի. միայն հանցավոր ձեռքը կարող էր նախագծել, որ տրոլեյբուսը գա Նոր Նորքի զանգվածից եւ Մերգելյան ինստիտուտում ավարտի ճանապարհը եւ ոչ մի տեղ այդտեղից չտանի: Հատուկ է արված, որ ոչ մեկ չնստի, եւ դրանք ոչնչացնելու հիմնավորում լինի: Տրանսպորտը բիզնեսի հեշտ տեսակ է, որտեղ հեշտ է թաքցնել դրամական միջոցները եւ եկամուտները: Այստեղ ոչ մի քանակ չի վերահսկվում: Երեւանում օրական երթեւեկում է շուրջ 600 հազար մարդ, օրական շուրջ 70 հազար դոլարի ավելցուկ բաշխվում է ինչ-որ գրպանների միջեւ»:
Սպառողների ասոցիացիայի նախագահի կարծիքով, էլէկտրատրանսպորտը Հայաստանում նախընտրելի է, քանի որ մենք ունեն էլէկտրաէներգիայի ավելցուկ:
«Մենք բացառիկ երկիր ենք երկրագնդի վրա: Այդպիսի երկիր չկա, որ մեզ պես էլեկտրաէներգիայի ավելցուկ ունենա: Ավելցուկը կենցաղային լեզվով է ասված, դա կոչվում է չծանրաբեռնված հզորություններ, մեր գեներացնող հզրությունները մեկ երրորդով են զբաղված, իսկ դա օգտագործելու տեղը մետրոն է, էլեկտրտրանսպորտը: Բայց դրա փոխարեն մենք բենզին, սալյարակա եւ վառելիքի մյուս տեսակներ են ներկրում: Սա տնտեսավարման ձեւ չէ, զավեշտ է»,- նշեց Արմեն Պողոսյանը:
Պարոն Պողոսյանը նշեց, որ Երեւանում ավելի ձեռնտու կլինի շահագործել ոչ թե միկրոավտոբուսներ, այլ մեծ ավտոբուսներ:
«1988-ից աշխատում եմ քաղաքապետների հետ եւ նրանք պնդում են, որ մեծ ավտոբուսները ձեռնտու չեն: Բայց եթե մեծը ձեռնտու չլիներ, ապա չէինք սարքի 405 տեղանոց բոինգ ինքնաթիռ, թե չէ ամեն մեկը մենակ ճաապարհ կընկներ: Մեր փողոցները բավարար են մեծ ավտոբուսների համար: Մեկ մեծ ավտոբուսը կտանի այնքան մարդ, որքան 4 միկրոավտոբուսը»,- նշեց Արմեն Պողոսյանը:
Արմեն Պողոսյանը կարծիքով՝ Երեւանի ավագանին չի կատարում իր աշխատանքը, եւ նրանց պետք է անվստահություն հայտնել. «Մենք ընտրել ենք ավագանի, մենք նրանց անվստահություն ենք հայտարարում, թող գնան տուն»: