Վրաց ուղղափառ եկեղեցին դատապարտում է Թբիլիսիում հայկական եկեղեցու մոտ տեղի ունեցած միջադեպը եւ կոնֆլիկտին մասնակցած կողմերին խաղաղության եւ հանգստության կոչ է անում:
Վրաց ուղղափառ եկեղեցու տարածած հատուկ հայտարարությունում ասվում է, որ տեղի ունեցածի հետ կապված հանդիպում է կայացել, որտեղ նշվել է, որ կոնֆլիկտը տեղի է ունեցել կենցաղային հողի վրա:
Նշենք, որ այսօր՝ հուլիսի 22-ին Վրաստանի պատրիարքությունում տեղի է ունեցել հանդիպում Վրաստանի պատրիարքության արտաքին գործերի բաժնի պետ, Ծաիշի եւ Զուգդիդիի միտրոպոլիտ Գերասիմի եւ Հայ առաքելական եկեղեցու Վիրահայոց թեմի եպիսկոպոս Վազգեն Միրզախանյանի միջեւ:
«Կողմերը նշել են, որ այդ հակամարտությունը սկսվել է կենցաղային հողի վրա եւ չի կրում կրոնական եւ էթնիկ բնույթ, որի հետ համաձայն են բոլոր հասարակական ու իրավապաշտպան կազմակերպությունները»,-ասված է հայտարարությունում:
Միաժամանակ պատրիարքությունը նշում է, որ «առանձին կազմակերպություններ» անում են սխալ եւ անպատասխանատու հայտարարություններ: «Վրաց եկեղեցին դատապարտում է այդ միջադեպը եւ կողմերին հանդարտության ու խաղաղության կոչ է անում»,-ասված է հայտարարությունում: