Արտյոմ Կարապետյանի՝ («Շեկո») սպանության համար Գյումրիի նախկին քաղաքապետ Վարդան Ղուկասյանի եղբորորդուն՝ Վահե Ղուկասյանին, 17 տարվա ազատազրկման են դատապարտել այն բանի համար, որ «փոխհրաձգության ժամանակ նա չի մահացել»: NEWS.am-ի հետ զրույցում Շիրակի մարզի ընդհանուր իրավասության դատարանի վճիռն այդպես մեկնաբանեց ամբաստանյալի փաստաբան Հայկ Ալումյանը:
«Դատավճիռը, բնականաբար, շատ բացասական եմ գնահատում: Ես ի սկզբանե ասել եմ, որ եղել է հարձակում, Վահե Ղուկասյանը պատասխանել է հարձակմանը, եղել է փոխհրաձգություն, Վահեն ավելի դիպուկ է եղել: Հիմա էլ Վահե Ղուկասյանին մեղադրում են նրա մեջ, թե ինչու ինքը չի մահացել փոխհրաձգության ժամանակ»,- ասաց նա:
Փաստաբանի կարծիքով՝ առաջին ատյանի դատարանը որոշումը կայացրել էր՝ մինչեւ իր պաշտպանական ճառին ծանոթանալը. «Ես կարդացի իմ ճառը, որից ընդամենը 1.5 ժամ հետո հրապարակեցին դատավճիռը: Դա նշանակում է, որ դատավճիռը պատրաստ էր, դատավորն էլ ձեւական լսեց մեզ: Թե ինչու է նման որոշում կայացրել դատարանը, չգիտեմ, քանի որ դատավճռի պատճառաբանական մասին ծանոթ չեմ»:
Վահե Ղուկասյանի փաստաբանը դիմելու է ՀՀ Վերաքննիչ քրեական դատարան՝ բողոքարկելու Շիրակի մարզի ընդհանուր իրավասության դատարանի հուլիսի 22-ին կայացրած որոշումը:
Հիշեցնենք, որ դեպքը տեղի էր ունեցել 2013թ. ապրիլի 23-ին։ Գյումրիի Շիրակացի 54բ շենքի մոտից հրազենային վնասվածքներով հիվանդանոց էին տեղափոխվել «Քավոր Հարութը» եւ «Շեկոն», վերջինը հիվանդանոցում մահացել էր: Ապրիլի 24-ին ոստիկանության Գյումրիի բաժնում Գյումրիի նախկին քաղաքապետ Վարդան Ղուկասյանի եղբորորդին՝ 24-ամյա Վահե Ղուկասյանը, խոստովանել էր, որ նշված հանցագործությունը կատարել է ինքը:
Նշենք, որ «Քավոր Հարութը» եւ «Շեկոն» նախկինում խնդիրներ են ունեցել Գյումրիի նախկին քաղաքապետ Վարդան Ղուկասյանի հարազատների հետ: Վահե Ղուկասյանի եւ «Քավոր Հարութի» միջեւ հակամարտության պատմությունը գալիս է դեռեւս 2013-ից, երբ «Քավոր Հարութի» այն ժամանակ դեռ անչափահաս որդին՝ Գեւորգ Խաչատրյանը, Սլաբոտկա թաղամասում վիճաբանելով Վարդան Ղուկասյանի եղբոր ՝Գեւորգ Ղուկասյանի հետ, հարվածել էր վերիջինին՝ հասցնելով մարմնական վնասվածք: Այս դեպքից հետո հակամարտող ընտանիքների երիտասարդները հաշտության եզրեր չգտան, մինչեւ տեղի ունեցավ ողբերգություն։