«Բարգավաճ Հայաստան» կուսակցության հետ սերտացումը կործանում է Հայ ազգային կոնգրեսը: Այս մասին հուլիսի 23-ի մամուլի ասուլիսում հայտարարել է «Քրիստոնեա-ժողովրդական վերածնունդ» կուսակցության նախագահ Սոս Գիմիշյանը:
Ըստ նրա՝ ժամանակը ցույց է տալիս՝ որքան շատ է ՀԱԿ-ը փորձում խորացնել համագործակցությունը ԲՀԿ-ի հետ, այնքան ավելի նվազում է նրա նկատմամբ հանրության վստահությունը:
«Լեւոն Տեր-Պետրոսյանը կարծում է, որ ԲՀԿ-ն կտրելով իշխանություններից՝ կոչնչացնի իշխող ռեժիմը: Սակայն հակառակն է տեղի ունենում՝ ոչնչանում է ինքը՝ կուսակցությունը», - նշել է Գիմիշյանը:
Հիշեցնենք, վերջին հարցազրույցում Լեւոն Տեր-Պետրոսյանը հայտարարել էր, որ սահմանադրական բարեփոխումներին դեմ են արտահայտվել գրեթե բոլոր քաղաքական ուժերը, սակայն իշխանությունը գլխավոր խոչընդոտը համարում է ԲՀԿ-ի դիրքորոշումը: «Եվ եթե մինչեւ հիմա նա փորձում էր այդ խոչընդոտը հաղթահարել բլիթի, այսինքն վերջինիս ինչ-ինչ խոստումներով սիրաշահելու քաղաքականությամբ, ապա այժմ, մեզ հասու տեղեկատվության համաձայն, գործի դնելով ողջ իրավապահ մեքենան, նա պատրաստվում է ԲՀԿ-ի նկատմամբ կիրառել մտրակի, այն է` սպառնալիքների եւ շանտաժի լեզուն, ինչը որեւէ պարագայում չի կարող հանդուրժվել քաղաքական մյուս ընդդիմադիր ուժերի եւ ողջ հասարակության կողմից», - մասնավորապես ասել էր ՀԱԿ-ի առաջնորդը:
