Լոռու մարզի Վանաձոր-Գյումրի միջպետական ճանապարհին՝  Մեծ Պառնի գյուղի մոտ, այսօր՝ հուլիսի 23-ին, ժամը 11։00-ի սահմաններում հերթական ավտովթարն է տեղի ունեցել։ Իրար են բախվել Ծաղկաբեր գյուղի բնակիչ Ա. Հունանյանի վարած «Օպել-կորսա» և Ս. Մանուկյանի վարած «Հոնդայի սոնատա» մակնիշի ավտոմեքենաները:

Լոռու մարզում NEWS.am-ի թղթակիցը հաղորդում է, որ վթարի հետեւանքով զոհեր չկան, «Օպել կորսա» մեքենայի վարորդ Ս. Մանուկյանը տեղափոխվել է հիվանդանոց:

Նշենք, որ դեպքը տեղի է ունեցել Սպիտակ-Գյումրի ճանապարհի 17-րդ կիլոմետրում, որտեղ հաճախ են վթարներ լինում արագությունը սահմանափակող նշանների բացակայության պատճառով։ Անցած տարի հենց այդ հատվածում էր վթարի հետեւանքով 11-ամյա աղջիկ մահացել։

Վանաձորցիները NEWS.am-ի հետ զրույցում դժգոհեցին, որ Սպիտակի շրջադարձից մինչեւ Գյումրիի ոլորանները՝ 24 կիլոմետրի վրա ոչ մի արագաչափ չկա, եւ մեքենաները այդ հատվածում երթեւեկում են մեծ արագությամբ։ Բանը հասել է նրան, որ հարակից համայնքների ղեկավարները մտադիր են նամակով դիմել Ճանապարհային ոստիկանությանը՝ խնդրելով այդ հատվածում արագաչափեր տեղադրել։