Ադրբեջանի քրդերը սատարել են անկախ Քուրդիստան ստեղծելու գաղափարին:
haqqin.az-ը, վկայակոչելով «Rudaw» քրդական տեղեկատվական պորտալը, հաղորդում է, որ Իրաքի հյուսիսում գտնվող Արբիլ քաղաքում քրդական համագումարին մասնակցած Կովկասի եւ Արեւելյա Ասիայի քրդական պատվիրակները սատարել են անկախ Քուրդիստանի ստեղծման առաջարկությունը:
Համագումարին Ադրբեջանի քրդական համայնքը ներկայացրել է քուրդ ակտիվիստ Խաժար Շամիլ Ասկերով: Իր ելույթում Ասկերովը ադրբեջանական քրդերի անունից իր աջակցությունն է հայտնել անկախ Քուրդիստանի գաղափարին: Շ.Ասկերովի խոսքով՝ առաջին անգամ քրդերը պատմական հնարավորություն են ստացել իրենց պետությունը ստեղծելու, եւ «մենք չենք կարող այն կորցնել», - ասվում է ելույթի տեքստում:
Համագումարին հանդես է եկել Ադրբեջանից մեկ այլ քուրդ ակտիվիստ Աբրահիմը. «Աշխարհի բոլոր քրդերը պետք է միավորվեն անկախ Քուրդիստանի համար»: