Երեւանի Նոր-Նորք թաղամասում հարեւանների՝ Սարգսյանների կողմից հուլիս 15-ին դաժան ծեծի ենթարկվելուց հետո մահացած, արցախյան ազատամարտի մասնակից, 52-ամյա Վարդան Թումանյանի դեպքին տեսանյութով անդրադարձել է ոստիկանության լրատվական ծառայությունը:
Քննիչի կայացրած որոշման մեջ մանսավորապես գրվում է. «Բաբկեն Սարգսյանի թոռները՝ Սարգիս Ղուկասյանը, Վիկտոր Հովսեփյանը, եւ որդին՝ Գեւորգ Սարգսյանը, ինքնադատաստան տեսնելու նպատակով գնացել են Վարդան Թումանյանի տան բակ, որտեղ գիտակցելով ամեն ինչ՝ միասին ծեծի են ենթարկել Վարդան Թումանյանին»:
Ավելի վաղ NEWS.am-ը հայտնել էր, որ սպանված ազատամարտիկի հարազատների խոսքով՝ հուլիսի 13-ին հարեւաների՝ Վարդան Թումանյանի եւ Բաբկեն Սարգսյանի միջեւ վիճաբանություն է առաջացել շախմատի խաղի ժամանակ։ Երբ Վարդան Թումանյանը տանն է եղել, Բաբկեն Սարգսյանի հարազատները եկել են նրա հետ «զրուցելու», տնից դուրս են հրավիրել ու դաժան ծեծի ենթարկել դստեր եւ կնոջ ներկայությամբ։ Մի քանի օր անց Վարդան Թումանյանը հիվանդանոցում մահացել էր։ 52-ամյա Վարդան Թումանյանը չորս երեխաների հայր էր, տան հիմնական աշխատողն էր, արհեստավոր: Նրա 12-ամյա դուստրը՝ Լիլին տառապում է մանկական ուղեղային կաթվածով: Վարդան Թումանյանի մահվան առնչությամբ հարուցվել է քրեական գործ Քրեական օրենսգրքի 112-րդ հոդվածի 2-րդ մասի 6-րդ, 14-րդ կետերով, այն է՝ դիտավորությամբ առողջությանը ծանր վնաս պատճառելը, որը կատարվել է մի խումբ անձանց կամ կազմակերպված խմբի կողմից, եւ անզգուշությամբ առաջացրել տուժողի մահ: Գեւորգ Սարգսյանն ու Սարգիս Ղուկասյանը կալանավորվել են։ Վիկտոր Հովսեփյանը հետախուզման մեջ է: Նախաքննությունը շարունակվում է:
