Մայիսի 17-ին Վերնիսաժում տեղի ունեցած միջադեպի ժամանակ ԱԺ ԲՀԿ-ական պատգամավոր Կարո Կարապետյանի (Յուվեցի Կարո) փեսան՝ Գոռ Առաքելյանը, մենակ չի եղել, նրա հետ մի տղա էլ է եղել, որին այսօր թաքցնում են (ֆոտոշարք): Այս մասին այսօր՝ հուլիսի 24-ին, NEWS.am-ի հետ զրույցում ասաց «Վենիսաժի» կրակոցների գործով կալանավորված Վալերի Հովհաննիսյանի մայրը՝ Լիա Հովհաննիսյանը:
«Գոռի հետ մի տղա էլ ա եղել, իմ տղան զրուցել է Գոռի հետի տղայի հետ: Ու՞ր ա էդ Գոռի հետի տղան, ո՞նց թաքցրեցին: Իմ տղան Գոռի հետ չի էլ զրուցել, զրուցել է մեկ ուրիշ տղայի հետ, իրանք իրար հետ նորմալ խոսել են, չեն էլ վիճել: Հետո Գոռը եկել ա, մեքենայի դուռ բացել ու կրակել: Թե ինչից է սկսվել, ու ինքն ու Ներսեսը ինչ են խոսել, իմ տղան տեղյակ չէ դրանից»,- պատմեց տիկին Լիան:
Տիկին Լիայի կարծիքով, գործով կասկածյալներ՝ Գոռ Առաքելյանը եւ Ներսես Մելքոնյանը միավորվել են եւ գործում են իր տղայի դեմ. «Հատուկ տարել են, որ իմ տղու գլխին սարքեն: Իմ երեխեն տուժող է, տուժողի գլխին սարքում են, հատուկ Յուվեցի Կարոյի կատարած գործն է: Միացել են իրար, գործում են, ասում են՝ մենք երկուսս փող ունենք, դուք չունեք, ուրեմն քո տղան պիտի գնա նստի»:
Հարցին, թե արդյոք Ներսես Մելքոնյանը եւ Վալերի Հովհաննիսյանը ընկերներ չեն, Լիա Հովհաննիսյանը պատասխանեց. «Չէ, ծանոթներ են, ի՞նչ ընկեր, ծախվող մարդը, որը նստեց, գնաց, փախավ, իմ երեխուն թողեց արնաքամ, ի՞նչ ընկերոջ մասին է խոսքը: Դավաճանները ընկերներ չեն լինում, նա միացել է նրան ու դավաճանում են իմ երեխուն»:
Տիկին Լիայի խոսքով, իրենց հետապնդում են. «Զգում ենք, որ մեզ հետապնդում են, հետեւում են մեր քայլերին»:
Հիշեցնենք, որ ըստ նախնական վարկածի՝ 2014 թ.-ի մայիսի 17-ին «Վերնիսաժի» ավտոկայանատեղիում վիճաբանություն է տեղի ունեցել Գոռ Առաքելյանի եւ Ռուսաստանից նոր վերադարձած Վալերի Հովհաննիսյանի ու նրա ընկերոջ՝ Ներսես Մելքոնյանի միջեւ։ Գոռ Առաքելյանն անկանոն կրակ է բացել, ինչի հետեւանքով 5 մարդ վիրավորվել է, այդ թվում՝ Վալերի Հովհաննիսյանն ու Ներսես Մելքոնյանը, պատահական 3 անցորդ։ Գոռ Առաքելյանը, Վալերի Հովհաննիսյանն ու Ներսես Մելքոնյանը կալանավորված են։
