Արցախի Քաշաթաղի շրջանում հուլիսի 22-ի վաղ առավոտյան ականի պայթյունից մահացած Արամ Խլղաթյանը Արմավիրի քաղաքապետի 8 տարվա վարորդն էր, որսի մշտական ուղեկիցը: Այս մասին NEWS.am-ին ասացին Արմավիրի բնակիչները: Նրանց խոսքով՝ Արամ Խլղաթյանը 3 երեխա ունի, ամենափոքրը՝ որդին, 10 տարեկան է:
«Շատ ափսոս, բոլորս ցնցված ենք: Արտակարգ մարդ էր»,-ասաց արմավիրցիներից մեկը:
Բնակիչները պատմեցին, որ Արամ Խլղաթյանը քաղաքապետ Ռուբեն Խլղաթյանի մոտ էր աշխատում նրա քաղաքապետ ընտրվելու օրվանից՝ արդեն 8 տարի:
Արմավիրցիները պատմեցին նաեւ, որ քաղաքապետը հաճախ է գնում որսի, հիմնականում Գյումրի եւ ԼՂՀ: NEWS.am-ի տեղեկություններով՝ դեպքի օրը Արմավիրի քաղաքապետը Քաշաթաղ հենց որսի էր գնացել, ինչպես միշտ՝ նույն խմբով:
Հիշեցնենք, որ Գառնիկ Ավետիսյանին պատկանող «Տոյոտա պրադո» մակնիշի 71OM100 պետհամարանիշի ավտոմեքենան պայթել է ԼՂՀ Քաշաթաղի շրջանի Վաղազին գյուղում՝ճանապարհահատվածին, որտեղով սովորաբար վաղազինցիներն անցնում են: Պայթյունի հետեւանքով Արմավիրի քաղաքապետ Ռուբեն Խլղաթյանը, ԼՂՀ բնակիչ Արթուր Բաղդասարյանը եւ մեքենայի սեփականատեր Գառնիկ Ավետիսյանը տեղափոխվել են Երեւանի «Էրեբունի» բժշկական կենտրոն: Նրանց վիճակը գնահատվում է կայուն:
