Գյումրիի պետական Մանկավարժական ինստիտուտի ռեկտոր Վարդեւան Գրիգորյանի եղբոր՝ Հարություն Գրիգորյանը, որի դին գտել են այսօր՝ հուլիսի 24-ին, Գետք համայնքի չօգտագործվող ֆերմաներից մեկի տարածքում, ընդամենը 2-3 ամիս առաջ էր վերադարձել Հայաստան: Այս մասին NEWS.am-ի թղթակցի հետ զրույցում նշեց ՀՀԿ խմբակցության պատգամավոր Սուքիաս Ավետիսյանը, որը մտերիմ է Գրիգորյան եղբայրների հետ:
«Մանրամասներ տեղյակ չեմ, շատ ցավալի, անակնկալ լուր էր: Այս րոպեին ոչ ոք ոչինչ չի կարող հստակ ասել: Մարմինը գտել են քաղաքից դուրս: Նա Գյումրիում չէր դրսում էր: 3 ամիս առաջ է վերադարձել Հայաստան: Այս պահին որեւիցե հստակ բան ասել չեմ կարող: Ճիշտ չի նաեւ փորձել եզրահանգումներ անել»,-ասաց Ավետիսյանը:
Հարցին, թե գուցե բիզնես շահերի բախման արդյունքում է տեղի ունեցել սպանությունը, ՀՀԿ-ական պատգամավորը պատասխանեց. «Գրիգորյան եղբայրները էությամբ այդպիսի մարդիկ չէին, որ թշնամիներ ունենային: Չեմ կարծում, որ լուրջ բիզնեսի խնդիր եղած լինի, չեմ էլ ուզում այդ ուղղությամբ մտածել: Գուցե դա զուտ միջադեպ է եղել, պատահական վեճի արդյունք: Երեւի կպարզվի ամեն բան:
Ավելի վաղ NEWS.am-ը հայտնել էր, որ այսօր՝ հուլիսի 24-ին, ժամը 16:00-ի սահմանում, Շիրակի մարզի Գետք համայնքի չօգտագործվող ֆերմաներից մեկի տարածքում գտել են Գյումրիի պետական Մանկավարժական ինստիտուտի ռեկտոր Վարդեւան Գրիգորյանի եղբոր՝ Հարություն Գրիգորյանի դին՝ հրազենային վնասվածքով։
Գետք համայնքի ղեկավար Հովիկ Մխիթարյանը NEWS.am-ի հետ զրույցում նշել է, որ իրեն ահազանգել է համայնքի բնակիչներից մեկը եւ տեղեկացրել, որ ինչ-որ անհայտ ավտոմեքենա երկար ժամանակ է՝ կայանված է ֆերմաներից մեկի տարածքում:
«Ինձ որ զանգեցին, ես արագ հասա ֆերմայի մոտ ու տեսա սպիտակ գույնի «Ֆորդ» մակնիշի մեքենան։ Մոտեցա, տեսա, որ մահացած մարդ կա ու հրազենային վնասվածք ուներ: Ես շատ վախեցա ու արագ ոստիկանություն կանչեցի», - պատմել է գյուղապետը: