«Հայոց ցեղասպանության 100-րդ տարելիցին ընդառաջ» ծրագրի շրջանակում Արարատյան Հայրապետական թեմի երիտասարդներն այսօր՝ հուլիսի 24-ին, Ազատության հրապարակից եւս մեկ անգամ Թուրքիային հղեցին «Մենք հիշում ու պահաջում ենք» կարգախոսը: Մի քանի հարյուր երիտասարդներ Ազատության հրապարակում ֆլեշմոբ անցկացրին, նրանք այնտեղ փռված ՝ Արևմտյան Հայաստանի վիլայեթների քարտեզի վրա՝ յուրաքանչյուր վիլայեթի տարածքում, մոմերով գրեցին Ցեղասպանության ժամանակ տվյալ վիլայեթում զոհված մարդկանց թիվը: (ֆոտոռեպորտաժ)
«Հայոց ցեղասպանության 100-րդ տարելիցին ընդառաջ» ծրագրի շրջանակում մենք յուրաքանչյուր ամսի 24-ին որեւէ միջոցառում ենք ունենում՝ արթուն պահելով ցեղասպանության զոհերի հիշատակը: 24` խորհրդանշական թիվն է ընկած հիմքում, որ հենց ամսի 24-ին են միջոցառումները տեղի ունենում: Այսօրվա ֆլեշմոբն այն մարդկանց էր ուղղված, ովքեր որ զոհ են գնացել Ցեղասպանությանը: Մոմեր դնողների մեջ կային նաեւ հղիներ, տարեցներ, երեխաներ, որը նպատակ ունի ասելու, որ բոլորն են հիշում եւ դատապարտում Ցեղասպանությունը»,-NEWS.am-ի հետ զրույցում ասաց Արարատյան Հայրապետական թեմի Ավանի Սուրբ Աստվածածին եկեղեցու երիտասարդական միության ատենապետ Հասմիկ Միրզոյանը՝ նշելով, որ միջոցառումները կշարունակվեն մինչեւ հաջորդ տարվա ապրիլի 24-ը:
Ֆլեշմոբի ժամանակ Ազատության հրապարակում վառված մոմերը հանգցրին 14 տղաներ՝ մոմերի վրա արյունը խորհրդանշող՝ կարմիր հեղուկ լցնելով: Ֆլեշմոբի մասնակիցները աղոթեցին, որից հետո քոչարի պարեցին:
«Միասնական շուրջպարը խորհրդանշում է մոխիրներից հառնող ժողովրդին, խորհրդանշում է մեր միասնականությունը»,-ասաց Հասմիկ Միրզոյանը:
Ֆլեշմոբի ավարտին երիտասարդները միասին երկու անգամ բարձրաձայն կոչ հղեցին Թուրքիային. «Լսիր, Թուրքիա: Մենք հիշում ու պահաջում ենք»:
