Գյումրիի պետական մանկավարժական համալսարանի ռեկտոր Վարդեւան Գրիգորյանի սպանված եղբոր`Հարություն Գրիգորյանի մարմնին բռնության հետքեր են հայտնաբերվել, այդ թվում նաեւ հրազենային վնասվածքներ որովայնի, մեջքի եւ ձեռքի հատվածում:
Ոստիկանության մամուլի ծառայությունը հայտնում է, որ հուլիսի 24-ին` ժ. 17:10-ի սահմաններում, Գետք համայնքի գյուղապետից ահազանգ է ստացվել, որ գյուղի տարածքում տղամարդու դիակ է հայտնաբերվել:
Դեպքի վայր ժամանած ոստիկանության օպերատիվ աշխատակիցները հայտնաբերել են 1964 թ. ծնված Հարություն Գրիգորյանի դին: Մարմինը զննելիս հայտնաբերվել են բռնության հետքեր, այդ թվում նաեւ հրազենային վնասվածքներ: Դեպքի վայրում հայտնաբերել են 9 մմ տրամաչափի երկու փամփուշտ եւ 5 պարկուճ:
Հարուցվել է քրեական գործ` ՀՀ ՔՕ-ի 104-րդ հոդվածով (սպանություն) եւ 235 հոդվածի 1-ին մասով (ապօրինի զենք կրել) :
