ՀՀ գյուղատնտեսության նախարար Սերգո Կարապետյանի աշխատանքային այցը Կոտայքի մարզ սկսվել է Ձորաղբյուր համայնքում գտնվող «Բիո Գրուպ» ՍՊԸ-ից: Նախորդ տարում գործարկված` հոլանդական ժամանակակից սարքավորումներ եւ 1,8 հեկտար տարածք ունեցող ջերմոցային այս տնտեսությունում հիդրոպոնիկ եղանակով արտադրվում է լոլիկ, որը մեծ պահանջարկ ունի շուկայում:
Նախարարը մարզպետ Արամ Հարությունյանի ուղեկցությամբ ծանոթացել է լոլիկի մշակության պայմաններին, ինչպես նաեւ արտադրության ընդլանման համար իրականացվող աշխատանքներին: Ներկայումս այստեղ մշտական աշխատանք ունի 26 անձ, որոնց թիվն ընկերության ընդլայնումից հետո զգալիորոեն կավելանա: Տեղեկացնելով նախարարին, որ առայժմ ընկերության արտադրանքն իրացվում է միայն տեղական շուկայում, ջերմոցային տնտեսության տնօրեն Գուրգեն Թորգոմյանը նշեց, որ արտադրանքի ծավալների ընդլայնումից հետո ընկերությունը մտադիր է սկսել նաեւ արտահանման գործընթացը եւ արդեն կան համապատասխան պայմանավորվածություններ:
Այնուհետեւ նախարարը ծանոթացավ Ձորաղբյուր համայնքի հացահատիկի բերքահավաքի ընթացքին: Ընդհանուր առմամբ, այս տարի Կոտայքի մարզում մշակովի ցանքատարածություններն ավելացել են 500 հեկտարով, իսկ Ձորաղբյուր համայքնում ընթացիկ տարում կատարվել է 140 հեկտար հացահատիկային մշակաբույսերի ցանք, որից գարնանացան գարի` 110 հեկտար, գարնանացան ցորեն` 30 հեկտար: Այս տարի համայնքում արդեն արտադրվել է 308 տոննա հացահատիկ, միջին բերքատվությունը հեկտարից կազմում է 30 ցենտներ: Գյուղատնտեսական աշխատանքներն առավել արդյունավետ իրականացնելու համար Ձորաղբյուր համայնքին պետական աջակցության ծրագրի շրջանակներում հատկացվել է սերմացու, պարարտանյութ եւ դիզելային վառելանյութ: Սերգո Կարապետյանը զրուցեց նաեւ գյուղացիների հետ, որոնք իրենց գոհունակությունը հայտնեցին այս տարվա բերքի որակից: Հանդիպման ընթացքում նախարարը հանձնարարեց մարզպետարանի գյուղատնտեսության եւ բնապահպանության վարչության պետին հաշվարկել եւ Գյուղատնտեսության նախարարություն ներկայացնել այս տարվա աշնանացան ցորենի, եկող տարվա գարնանացան գարու սերմացուների, պարարտանյութի եւ դիզելային վառելանյութի ողջ պահանջարկը` պետական աջակցության ծրագրերի շրջանակներում այն լիովին բավարարելու համար:
Այցի վերջին կանգառը Գողթ համայնքում էր, որտեղ նախարարը ծանոթացավ «Էկոտոմատո» ՓԲԸ գործունեության հետ: 8 հեկտարի վրա վարդերի աճեցման ջերմոցային այս տնտեսությունն իր արտադրանքով միակն է, որտեղ ներդրված են հոլանդական «Դալսեմ» ընկերության ժամանակակից տեխնոլոգիաները: Ընկերության տնօրեն Արսեն Սանդոյանի խոսքով` ներկայումս ընկերությունում ներգրավված է 75 աշխատակից, որոնց միջին աշխատավարձը կազմում է 120 հազար դրամ: Նա նաեւ տեղեկացրեց, որ այսօր «Էկոտոմատո» ՓԲԸ-ում աճեցվող բազմապիսի վարդերի շուրջ 75%-ը արտահանվում է:
