Նախագահ Սերժ Սարգսյանն այսօր՝ հուլիսի 25-ին ցավակցական հեռագիր է հղել Ֆրանսիայի Հանրապետության բախագահ Ֆրանսուա Օլանդին՝ Բուրկինա Ֆասոյից Ալժիր ուղեւորվող «Էյր Ալջերիա» ավիաընկերության ինքնաթիռի ողբերգական ավիավթարի կապակցությամբ, որին զոհ են գնացել բազմաթիվ մարդիկ, այդ թվում՝ շուրջ հինգ տասնյակ ֆրանսիացիներ։
«Այս ծանր պահին կիսելով Ձեր, զոհվածների հարազատների եւ բարեկամ ֆրանսիացի ժողովրդի վիշտն ու ցավը՝ անկեղծ վշտակցություն եւ զորակցություն ենք հայտնում, մաղթում համբերություն ու ոգու արիություն»,-ասված է ՀՀ նախագահի ցավակցական հեռագրում։
Սարգսյանը նաեւ ցավակցական հեռագիր է հղել Ալժիրի Ժողովրդական Ժողովրդավարական Հանրապետության նախագահ Աբդելազիզ Բութեֆլիկային՝ հուլիսի 23-ին Մալիի տարածքում «Էյր Ալջերիա» ավիաընկերության օդանավի ողբերգական վթարի կապակցությամբ, որը բազմաթիվ անմեղ զոհերի պատճառ է դարձել:
Հանրապետության նախագահն անկեղծ ցավակցություն եւ զորակցություն է հայտնել Ալժիրի նախագահին եւ Ալժիրի եղբայրական ժողովրդին՝ զոհվածների հարազատներին մաղթելով տոկունություն եւ համբերություն:
