Տղամարդը, ով հունիսին սպառնացել է Ստոկհոլմում ռումբ պայթեցնել, դատապարտվել է երկու տարվա ազատազրկման, որից հետո արտաքսվել է: Տղամարդը, որի պատճառով փակել էին Ստոկհոլմի մեծ մասը, դատապարտվել է կեղծ ահազանգի եւ ծանրացուցիչ հանգամանքներում քրեական սպառնալիքների համար: Այդ մասին գրում է շվեդական «The Local» պարբերականը:
43-ամյա տղամարդը, ով, հաղորդագրությունների համաձայն, երկքաղաքացիություն ունի՝ Իսրայելի եւ Հայաստանի, Շվեդիա է ժամանել ապրիլին «ընկերոջն այցելելու» համար եւ ապաստան է խնդրել: Նրա փաստաբանի խոսքով՝ նա մերժում է ստացել եւ որոշել է, որ միգրացիոն գերատեսչությունն իր հետ վատ է վարվել: Տղամարդը հունիսի 19-ին Գամլա-Սթան շրջանում ներխուժել է քաղաքացիական իրավունքների պաշտպանության գրասենյակ, որը մոտ է Չափավոր կուսակցության շտաբ-բնակարանին, եւ հայտնել է, որ իր մոտ ռումբ կա: Ողջ շրջանից մարդկանց տարհանել են, իսկ ոստիկանությունն ու սակրավորները հետազոտել են դեպքի վայրը: Հինգ ժամ տեւողությամբ բանակցություններից հետո տղամարդը հանձնվել է ոստիկանությանը: Քիչ անց պարզվել է, որ ռումբը կեղծ է: Տղամարդը խոստովանել է իր կատարած հանցագործությունները:
