Հուլիսի 25-ի լույս 26-ի գիշերը Հայաստանի հյուսիս-արեւելյան սահմաններում եւ Արցախի Հանրապետության շփման գծում մի քանի ուղղություններով հակառակորդի կողմից ձեռնարկված դիվերսիոն -հետախուզական գործողությունները կանխելիս հայկական կողմից մեկ զինծառայող է զոհվել, երկուսը՝ վիրավորվել։ Այս մասին այսօր՝ հուլիսի 26-ին, ասաց ՀՀ պաշտպանության նախարար Սեյրան Օհանյանը՝ Ծիծեռնակաբերդում ռազմական բուհերի լեյտենանտներին սպայական վկայականների հանձնման արարողության ժամանակ։
«Հակառակորդը տալով կորուստներ՝ անկասկած նահանջի դիմեց։ Փառք ու պատիվ բոլոր այն զինվորներին, որոնց թափված արյան շնորհիվ մենք այսօր ապրում ենք խաղաղության պայմաններում»,-ասաց նախարարը։
Սեյրան Օհանյանի խոսքով՝ ներկայումս հայկական զինուժի ստորաբաժանումները վերահսկում են իրավիճակը։
Ավելի վաղ ԼՂՀ ՊՆ-ն հայտնել էր, որ հուլիսի 26-ին, հակառակորդը ղարաբաղա-ադրբեջանական հակամարտ զորքերի շփման գծի հյուսիսային եւ հյուսիս-արեւելյան ուղություններով ձեռնարկել է դիվերսիոն հետախուզական ներթափանցման փորձեր:
ՊԲ առաջապահ զորամասերի կողմից ձեռնարկված օպերատիվ գործողությունների արդյունքում հակառակորդը կորուստներ կրելով ու թողնելով մեծաքանակ տեխնիկական միջոցներ եւ սպառազինություն, հետ է շպրտվել ելման դիրքեր: Ցավոք, գործողությունների հետեւանքով հրազենային մահացու վիրավորում է ստացել զինծառայող, 1994թ. ծնված Խաչատուր Լեւոնի Բադասյանը: