Կոտայքի մարզի Ակունք գյուղում հուլիսի 14-ին սպանված հնագետ Ֆիրդուս Մուրադյանի հարազատները սպասում են միկրոսկոպիկ անալիզների պատասխաններին, որոնք կապացուցեն՝ արդյոք հնագետն ինֆարկտ է ստացել Ավգուստին Աբրոյանի հարվածից, թե ոչ: Այս մասին NEWS.am-ին ասաց հնագետի հարսը՝ Հրարփի Աղաբեկյանը:
«Ավգուստին Աբրոյանը կմնա կալանքի տակ, մինչեւ կստանանք միկրոսկոպիկ անալիզների պատասխանները, որից հետո արդեն նախաքննությունը կշարունակվի, իսկ այդ անալիզները ստանալու ենք 20-40 օրվա ժամկետում»,- ասաց նա:
Հրարփի Աղաբեկյանի խոսքով՝ սկեսրայրի սպանության մեջ մեղադրվող Ավգուստին Աբրոյանի հարազատները փորձել են Պողոս Պետրոս եկեղեցու քահանայի միջոցով կապ հաստատել իրենց հետ՝ հաշտության գալու համար:
«Բնականաբար, մենք չենք համաձայնվել, նրանց հետ խոսելու ոչինչ չունենք»,- ավելացրեց սպանված հնագետի հարսը:
Նշենք, որ ավելի վաղ NEWS.am-ին սպանված հնագետի հարազատները հայտնել էին, որ ըստ դատաբժշկական փորձաքննության՝ նա մահացել է ինֆարկտից:
Ավելի վաղ, ոստիկանությունը հայտնել էր, որ Կոտայքի բաժնում հուլիսի 14-ին ժամը 11.30-ին Ակունք գյուղի եկեղեցու մոտ սպանություն էր տեղի ունեցել. «Պողոս Պետրոս» եկեղեցու մոտ վիճաբանության ժամանակ 34-ամյա Ավգուստին Աբրոյանը բութ գործիքով հարվածել էր 59-ամյա Ֆիրդուս Մուրադյանի գլխի հետնամասին, ինչի հետեւանքով Մուրադյանը տեղում մահացել է: Ավգուստին Աբրոյանը կալանավորված է: