Առողջապահության, առեւտրի եւ սպասարկումների, տեխնոլոգիաների, արտաքին ձեւավորման եւ գովազդի ոլորտներում Երեւանի քաղաքապետարանի ծրագրերի բարելավման ու կատարված աշխատանքների թվային ցուցանիշների դրական միտումներ են նկատվում։ Երեւանի քաղաքապետի տեղակալ Դավիթ Օհանյանը ներկայացրել է նշված ոլորտների կիսամյակային ամփոփ արդյունքները ։
2014 թվականին 49 տոկոսով ավելացվել է Երեւանի համայնքային բյուջեով առողջապահական ծախսերին հատկացված գումարը։ Այս տարի 165 մլն դրամ է ուղղվել Երեւանի քաղաքապետարանի ենթակայության բուժհաստատությունների համար բուսարքավորումներ գնելուն եւ 3 համաբուժարաններում էլ՝ մասնակի նորոգում կատարելուն։ Բուժսարքավորումների համար նախատեսված 100 մլն դրամից մրցույթից հետո տնտեսվել է շուրջ 24 մլն-ը, 4 մլն դրամ էլ տնտեսվել է վերանորոգման 50 մլն արժողությամբ ծրագրի կատարումից։ Երեւանի քաղաքապետ Տարոն Մարգարյանի նախաձեռնությամբ քաղաքապետարանը սոցիալապես անապահով բնակչության համար առաջին անգամ տոմոգրաֆիայի 15 մլն դրամ արժողությամբ թանկարժեք համարվող բուժծառայություն է գնել, որից արդեն օգտվել է 59 քաղաքացի։
«Առողջապահական համակարգում դեռեւս խորհրդային ժամանակաշրջանից ժառանգած խնդիրներ ունենք, հետեւաբար եւ՝ շատ անելիքներ, որպեսզի կարողանանք մեր բնակրչությանը որակյալ եւ մատչելի առողջապահական ծառայություններ մատուցել։ Ցավոք, ունենք հիմնարկներ, որոնք շահագործման օրից ի վեր չեն նորոգվել, չեն համալրվել սարքավորումներով։ Ծրագրով ձեռք է բերվել 14 անուն բուժսարքավորում. սա, իհարկե, բավարար չէ, հետեւաբար, ծրագիրը շարունակական է»,- նշել է Երեւանի քաղաքապետի տեղակալ Դավիթ Օհանյանը։
2014թ. առաջին կիսամյակում Երեւանի քաղաքապետարանի ենթակայության հիվանդանոցային ծառայություններ մատուցող 8 բուժհաստատություններ է դիմել 10.974 քաղաքացի՝ 4 տոկոսով պակաս հաշվետու նախորդ ժամանակաշրջանի համեմատ։ Շտապօգնության սպասարկման կանչերի թվում հիվանդանոց տեղափոխվողների թիվը մեկ տոկոսով ավելացել է՝ 113.272 կանչի դեպքում 21.333 հիվանդ։
Մայրաքաղաքում տարեկան կիսամյակային համեմատությամբ 3 տոկոսով ավելի է ծննդօգնության ցուցանիշը. Այս տարի Երեւանում արդեն 10.284 երեխա է ծնվել։
Անվճար դեղորայք ստացեղ քաղաքացիների թիվն էլ է ավելացել. 99.000՝ նախորդ առաջին կիսամյակի 96.450-ի դիմաց։
Երեւանի քաղաքապետարանի ենթակայության 23 համաբուժարաններ է դիմել 1 մլն 58 հազար 396 քաղաքացի։
Երեւանի քաղաքապետարանի ենթակայության բուժհաստատություններ դիմելության նվազման համապատկերին ավելացել է քաղաքապետարանի կազմակերպած անվճար բուժսպասարկման ակցիաներից օգտվող քաղաքացիների թիվը, հետեւաբար, ակցիան առողջապահականից բացի, նաեւ սոցիալական նշանակություն ունի։ Գարնանային «Ձեզ համար, կանայք» առողջապահական ակցիայով բուժհաստատություններ է դիմել 26.144 կին, ինչը նախորդ տարիների ցուցանիշները գերազանցել է 2-4 անգամ։ «Ձեզ համար, կանայք»-ն այս տարի ընդգրկել է գրեթե բոլոր ոլորտները։ Դավիթ Օհանյանը նշել է, որ քաղաքապետարանը պատրաստվում է հաջորդ ակցիային, որից, ի տարբերություն գարնանայինի, որից միայն կանայք էին օգտվում, կօգտվեն բոլորը:
«Օգոստոսի 1-ից մեկնարկում է «Երեւանյան ամառ» ծրագրի առողջապահական ենթածրագիրը, որը ներառում է վահանաձեւ գեղձի, սիրտ–անոթային հետազոտություներ եւ համակարգչային տոմոգրաֆիայի հետազոտություններ։ Ամառային ակցիան նախեւառաջ ունենալու է կանխարգելիչ նշանակություն՝ այս հիվանդությունների վաղ հայտնաբերելուն է ուղղված, անհրաժեշտության դեպքում նախատեսված է եւ բուժում»,- ներկայացրել է Երեւանի քաղաքապետի տեղակալը։