Միացյալ Նահանգները 2015 թվականի ապրիլի 24-ին Անկարայում պետք է ճշմարտության աներկբա եւ պարտադրող ձայնը լինի: Թուրքիայում ԱՄՆ դեսպանի պաշտոնում նախագահ Բարաք Օբամայի կողմից Ջոն Բասի թեկնածության առաջադրման առիթով հայտարարել է Հայ Դատի հանձնախմբի Վաշինգտոնի գրասենյակի գործադիր տնօրեն Արամ Համբարյանը:
«Հայ Դատի հանձնախումբը չի կարող սատարել Թուրքիայում ԱՄՆ դեսպանի պաշտոնում Ջոն Բասի թեկնածությունը՝ հիմնվելով Կոնգրեսում նրա ելույթների վրա, որոնք Հայոց Ցեղասպանության ճանաչման վերաբերյալ նախագահ Օբամայի խախտած խոստումի մասն են եւ ավելի են ամրապնդում ԱՄՆ կառավարության վրա Թուրքիայի «բերան փակող» քաղաքականությունը»,- հայտարարել է Արամ Համբարյանը, հաղորդում է Asbarez-ը:
Հիշեցնենք, որ ԱՄՆ Սենատի արտաքին հարաբերությունների հանձնաժողովը Բասի թեկնածությունը պետք է քվեարկության դներ հուլիսի 29-ին: Հայ Դատի գրասենյակի տնօրենը նաեւ անընդունելի է համարել փաստը, որ «Հայոց Ցեղասպանությունը ճանաչելու վերաբերյալ Օբամայի խոստման դրժումից վեց տարի, իսկ Թուրքիայի կողմից հայ-թուրքական արձանագրություններից հրաժարվելուց հինգ տարի անց, ավելին՝ Հայոց Ցեղասպանության 100-րդ տարելիցից մեկ տարի առաջ ԱՄՆ դեսպանի թեկնածուն Հայոց Ցեղասպանության մասին կոնգրեսականների հարցերին պատասխանել է թուրքական ժխտողական հռետորաբանությամբ՝ վկայակոչելով «ընդհանուր պատմության» մասին բարբանջանքը»։