Հարավային ռազմական շրջանի ռուսական ռազմաբազայի ավելի քան 300 հետախույզներ սովորելու են հաղթահարել լեռնային գետերը: Նրանք մարզվում են ՀՀ պաշտպանության նախարարության «Փամբակ» լեռնագնացների ուսումնա-մարզական համալիրում:
Վարժանքների ընթացքում ռուսական զինծառայողները 1.5 ամիս ապրելու են բարձրլեռնային, շոգ կլիմայի պայմաններում, ծովի մակերեւույթից ավելի քան 2 հազար մետր բարձրությամբ:
Դասընթացներն անցկացվելու են երկու փուլով: Առաջին փուլում զինծառայողները ծանոթանալու են գետերի դասակարգմանը, լեռնային գետերն անցնելու տեխնիկային, անցման ընթացքում հնարավոր դժբախտ դեպքերին, սովորելու են տուժածներին առաջին բուժօգնություն տրամադրել:
Երկրորդ փուլում մասնագետները զինծառայողներին սովորեցնելու են մի քանի տեսակի բազրիքների օգտագործմամբ լեռնային գետերն անցնելու միջոցներին:
