Հայաստանում 2014 թվականին 800 հրդեհ է գրանցվել, ինչի հետեւանքով այրվել է մոտ 855 հա տարածք: Մեծ եւ երկարատեւ անտառային հրդեհներ այս տարի չեն եղել: Այս մասին լրագրողներին ասաց ԱԻՆ փրկարար ծառայության օպերատիվ կառավարման վարչության արտակարգ իրավիճակների արձագանքման բաժնի պետ Արթուր Ոսկանյանը:
Տարին, իհարկե, դեռ ավարտված չէ, եւ հրդեհների վտանգը արդիական է լինելու մինչեւ սեպտեմբերի 30-ը, սակայն, Արթուր Ոսկանյանի կարծիքով, այս տարվա հրդեհների թիվը ամեն դեպքում ավելի փոքր է՝ նախորդ տարիների համեմատ:
Մասնավորապես, 2011 թվականին գրանցվել է 2699 հրդեհ, 2012 թվականին՝ 1404 հրդեհ, իսկ 2013-ին՝ 1399:
Հրդեհների քանակի նվազումը երկրում, Արթուր Ոսկանյանի կարծիքով, պայմանավորված է տեղումների քանակությամբ: Բացի այդ, հաճախակի հրկիզվող տարածքներն այսօր աշխատում են մշակել եւ խնամել: Մեծ դեր է խաղում նաեւ իրազեկումը՝ ծառայությունն աշխատում է տեղեկատվություն տարածել հրդեհներից խուսափելու մասին:
