Վրաստանի մայրաքաղաք Թբիլիսիում Gulf ընկերության նավթաբազայում հրդեհի արդյունքում առնվազն 40 պահուստարան է այրվել, 12 ավտոմեքենա պայթել է: Այս մասին տեղեկացրել է Արտակարգ իրավիճակների կառավարման ծառայության ղեկավար Թեմուր Գիորգաձեն: Նրա խոսքով, Թբիլիսիի Գլդանի շրջանն աղետից է փրկվել, քանի որ եթե պահուստարանները պայթեին, կընդգրկեին շրջանի ամբողջ տարածք:
«Աղետը կարող էր ավելի մասշտաբային լինել: Փրկարարական ջոկատներից մեկը կարողացել է կանխել պահուստարանի պայթյունը: Վտանգ կար, որ կրակը կհասնի նաեւ այլ մեքենաների: Պայթյունից 5 րոպե անց դեպքի վայր է ժամանել հրշեջ ծառայության առաջին ավտոմեքենան: 40 րոպե անց կրակը տեղայնացվել է»,- Գիորգաձեի խոսքերն է մեջբերում Грузия Online-ը:
Պաշտոնյայի խոսքով, դեպքի վայրի հարեւանությամբ ավտոպահեստամասերի խանութ եւ սպասարկման կետ կա, որտեղ էլ կանգնած են եղել մեքենաները:
Գիորգաձեն նշել է, որ պայթյունի պատճառների մասին տեղեկություններ առայժմ չունի: Փաստի առիթով հետաքննություն է կատարվում:
Հրդեհի արդյունքում թեթեւ տուժել է մեկ մարդ: Բժիշկները նրան օգնություն են ցուցաբերել տեղում: