Արցախի Քաշաթաղի շրջանում հուլիսի 22-ին ականի պայթյունից վիրավորված Արմավիրի քաղաքապետն իրեն արդեն լավ է զգում, սակայն «առայժմ լրագրողների հետ խոսել» չի ցանկանում:
«Լավ եմ արդեն, շնորհակալություն, բայց ես հիմա լրագրողների հետ խոսել չեմ ցանկանում: Ինձ ի՞նչ է եղել, որ չքայլեմ կամ վատ լինեմ: Լավ, ցտեսություն»,- NEWS.am-ի հարցին, թե ինչպես է զգում, այսպես արձագանքեց Արմավիրի քաղաքապետը:
Այլ հարցերի Ռուբեն Խլղաթյանը հրաժարվեց պատասխանել եւ անջատեց հեռախոսը:
Նշենք, որ Արմավիրի քաղաքապետը հիվանդանոցից դուրս է գրվել հուլիսի 30-ի կեսօրին: Հիշեցնենք, որ նա գլխուղեղի սալջարդ, արյունազեղում եւ 5-րդ մատի կոտրվածք ունի:
Ավելի վաղ NEWS.am-ը, հղում անելով Արտակարգ իրավիճակների նախարարությանը, հայտնել էր, որ հուլիսի 22-ին առավոտյան ժամը 06.30-ին սահմաններում ԼՂՀ-ի Քաշաթաղի շրջանի Վաղազին գյուղում. «Տոյոտա պրադո» մակնիշի 71OM100 պետհամարանիշի ավտոմեքենան պայթել է ականապատ տարածքում, ինչից Արմավիրի քաղաքապետի վարորդ Արման Խլղաթյանը տեղում մահացել է, իսկ ուղևորներ Ռուբեն Խլղաթյանը, Գառնիկ Ալեքսանյանը եւ Արթուր Բաղդասարյանը հոսպիտալացվել են բժշկական կենտրոն, այնուհետեւ ուղղաթիռով տեղափոխվել Երևանի «Էրեբունի» բժշկական կենտրոն: Ըստ շրջանառվող լուրերի՝ Արմավիրի քաղաքապետը Քաշաթաղ որսի էր գնացել:
