Շանհայի համագործակցության կազմակերպության (ՇՀԿ) շրջանակում հասունացել է Զարգացման բանկ ստեղծելու անհրաժեշտությունը: ИТАР-ТАСС-ի փոխանցմամբ, ՇՀԿ արտաքին գործերի նախարարների խորհրդի նիստի ժամանակ այս մասին հայտարարել է ՌԴ ԱԳ նախարար Սերգեյ Լավրովը:
«Հասունացել է կազմակերպության ծրագրային գործունեության՝ ֆինանսական ուղեկցության մեխանիզմների ստեղծման անհրաժեշտությունը: Մեր ֆինանսիստներն առավելապես արդյունավետ են համարում տարածաշրջանում հաջողությամբ գործող Եվրասիական զարգացման բանկի հիմքի վրա ՇՀԿ-ի Զարգացման բանկի հիմնադրման սխեման: Մենք քննարկում ենք այդ տարբերակը բոլոր գործընկերների հետ»,- տեղեկացրել է նախարարը:
Ռուսաստանցի դիվանագետի խոսքով, տնտեսական ոլորտում ՇՀԿ-ին հաջողվել է նկատելի արդյունքների հասնել:
«ՇՀԿ-ի հաջողությունների ցանկում կարելի է ներառել կազմակերպության անդամ պետությունների, դիտորդների եւ գործընկերների մասնակցությամբ Էներգետիկ ակումբի թողարկումը: Այն բաց եւ հեռանկարային հարթակ է էներգետիկ անվտանգության հարցերի քննարկման, էներգառեսուրսներ արտադրողների, առաքողների եւ սպառողների միջեւ կապեր ստեղծելու համար»,- ամփոփել է Սերգեյ Լավրովը:
