Չինաստանում գործող 14 տարվա արգելքից հետո աշխարհի խոշորագույն կորպորացիաներից մեկը՝ Microsoft-ը, վաճառքի է հանելու Xbox-ը: Այս մասին գրում է РИА Новости-ն՝ հղում կատարելով The Hindu-ին:
Նոր խաղային համակարգը՝ The Xbox One-ը, գնորդների համար հասանելի կլինի արդեն սեպտեմբերի 23-ից: Xbox-ի մարքեթինգի տնօրեն Յուսուֆ Մեհդիի տեղեկացմամբ, նորույթի գինը շուրջ 3.000 յուան է (600 դոլար):
Խաղային համակարգերը վաճառվելու են բջջային կապի China Telecom օպերատորի միջոցով: Լրատվամիջոցների տեղեկություններով, China Telecom-ի գործարքը Microsoft-ի համար հասանելի կդարձնի 104 մլն բաժանորդների ցանցը:
Xbox-ի նախնական պատվերներն արդեն ընդունվում են չինական JD.com առցանց-խանութում:
Հատկանշական է, որ Xbox One-ը դառնալու է խաղային առաջին համակարգը, որը վերջին 14 տարվա ընթացքում վաճառվելու է չինական շուկայում: 2000 թվականի սկզբին Պեկինն արգելել էր դրանց վաճառքը, քանի որ, իշխանությունների կարծիքով, դրանք բացասաբար են անդրադառնում երիտասարդության բարոյաէթիկական զարգացման վրա:
