Դանակի 21 հարվածով կնոջը սպանելու համար մեղադրվող Վոլոդյա Մուրադյանը կարող է դատապարտվել 12 տարվա ազատազրկման։ Մեղադրող Հայկազ Նիկողոսյանը այսօր՝ հուլիսի 31-ին, Արարատի և Վայոց Ձորի մարզերի ընդհանուր իրավասության դատարանին միջնորդեց նման պատիժ սահմանել Արարատ քաղաքի բնակիչ Վոլոդյա Մուրադյանի նկատմամբ՝ նրան մեղավոր ճանաչելով ՀՀ ՔՕ 104 հոդվածի 2-րդ մասի 5-րդ կետով՝ առանձնակի դաժանությամբ սպանություն։
Նշենք, որ սա այս հոդվածով նախատեսվող նվազագույն պատժաչափն է. հոդվածի այս կետը նախատեսում է 12-20 տարի ժամկետով կամ ցմահ ազատազրկում։
Նշենք, որ նախորդ դատական նիստերին ամբաստանյալը վստահեցրել է, որ առաջինը կինն է հարձակվել իր վրա դանակով, եւ որ կինը՝ Դիանա Նահապետյանը, սիրեկաններ է ունեցել։
Հիշեցնենք, որ Վոլոդյա Մուրադյանին մեղադրանք է առաջադրվել այն բանի համար, որ 2012թ. ապրիլի 12-ին Արարատ քաղաքի իրենց բնակարանի հյուրասենյակում ամուսնական անհավատարմության հարցի շուրջ վիճաբանության մեջ է մտել կնոջ՝ Դիանա Նահապետյանի հետ, որի ընթացքում կյանքից զրկելու նպատակով ապակյա ծաղկամանով հարվածներ է հասցրել նրա մարմնի տարբեր մասերին, այնուհետև Դիանա Նահապետյանի մազերից քաշելով տարել է խոհանոցի մուտքի մոտ, որտեղ խոհանոցային դանակով հարվածներ է հասցրել նրա մարմնի տարբեր մասերին՝ պատճառելով գլխի ձախ կողմնային, ծոծրակային շրջանների սալջարդ վերքեր, ճակատի արյունազեղումներ, դեմքի, պարանոցի, իրանի աջ վերին վերջույթի բազմաթիվ կտրած ծակած, թափանցող և չթափանցող վերքեր, զույգ թոքերի և լյարդի վնասվածքներ, ներքին և արտաքին արյունահոսություն։ Դիանա Նահապետյանը տեղում մահացել է։ Այս տեսարանին ներկա են եղել Դիանայի 14-ամյա և 17-ամյա դուստրերը, ովքեր դուրս գալով փողոց՝ փորձել են օգնություն խնդրել հարևաններից, բայց ոչ ոք չի արձագանքել։