Արտյոմ Կարապետյանի՝ («Շեկո») սպանության համար 17 տարվա ազատազրկման դատապարտված՝ Գյումրիի նախկին քաղաքապետ Վարդան Ղուկասյանի եղբորորդին՝ Վահե Ղուկասյանը համոզված է, որ դատավճիռն արդարացի չէ եւ պետք է բողոքարկել այն: Այս մասին NEWS.am-ին ասաց Վահե Ղուկասյանի փաստաբան Հայկ Ալումյանը:

«Պատրաստվում ենք բողոքարկել Շիրակի մարզի ընդհանուր իրավասության դատարանի կայացրած վճիռը: Եվ ես, եւ Վահեի հարազատները համոզված են, որ անպայման պետք է դիմել ՀՀ Վերաքննիչ դատարան եւ բողոքարկել վճիռը: Վահե Ղուկասյանի հետ էլ խոսել, ինքն էլ է ասում, որ դատավճիռն արդարացի չէ»,- ասաց նա:

Փաստաբանի խոսքով՝ իր պաշտպանյալն այս պահին գտնվում է «Արթիկ» քրեակատարողական հիմնարկում: Հարցին՝ արդյոք Վահե Ղուկասյանն իր պատիժը կրելու է հենց այդ ՔԿՀ-ում, Հայկ Ալումյանը չցանկացավ պատասխանել:

Նշենք, որ Վահե Ղուկասյանի գործով դատավճիռը կայացվել է հուլիսի 22-ին:

Հիշեցնենք, որ դեպքը տեղի էր ունեցել 2013թ. ապրիլի 23-ին։ Գյումրիի Շիրակացի 54բ շենքի մոտից հրազենային վնասվածքներով հիվանդանոց էին տեղափոխվել «Քավոր Հարութը» եւ «Շեկոն», վերջինը հիվանդանոցում մահացել էր: Ապրիլի 24-ին ոստիկանության Գյումրիի բաժնում Գյումրիի նախկին քաղաքապետ Վարդան Ղուկասյանի եղբորորդին՝ 24-ամյա Վահե Ղուկասյանը, խոստովանել էր, որ նշված հանցագործությունը կատարել է ինքը:

Նշենք, որ «Քավոր Հարութը» եւ «Շեկոն» նախկինում խնդիրներ են ունեցել Գյումրիի նախկին քաղաքապետ Վարդան Ղուկասյանի հարազատների հետ: Վահե Ղուկասյանի եւ «Քավոր Հարութի» միջեւ հակամարտության պատմությունը գալիս է դեռեւս 2013-ից, երբ «Քավոր Հարութի» այն ժամանակ դեռ անչափահաս որդին՝ Գեւորգ Խաչատրյանը, Սլաբոտկա թաղամասում վիճաբանելով Վարդան Ղուկասյանի եղբոր ՝Գեւորգ Ղուկասյանի հետ, հարվածել էր վերիջինին՝ հասցնելով մարմնական վնասվածք: Այս դեպքից հետո հակամարտող ընտանիքների երիտասարդները հաշտության եզրեր չգտան, մինչեւ տեղի ունեցավ ողբերգություն։

Լուսանկարը՝  Արսեն  Սարգսյանի/NEWS.am