Ադրբեջանի պաշտպանության նախարարությունը շարունակում է հակասական հայտարարություններով հանդես գալ:
Նախօրեին ադրբեջանական պաշտպանական գերատեսչությունը հերքել է Հայաստանի եւ Ղարաբաղի հետ սահմանին որեւէ գործողության իրականացումը, իսկ այսօր օրվա երկրորդ կեսին անսպասելիորեն խոստովանել է, որ «մարտերը տեւել են 3 օր»:
«Վերջին օրերին Հայաստանի Զինված ուժերը նկատելիորեն ակտիվացել են: Հակառակորդ ուժերը հայ-ադրբեջանական զինված ուժերի շփման գիծը հատելու բազմաթիվ փորձեր են ձեռնարկել»,- ասված է Ադրբեջանի պաշտպանության նախարարության արտակարգ հայտարարության մեջ:
Գերատեսչության հաղորդմամբ, «հայոց բանակի հետախուզական-դիվերսիոն ջոկատները նախօրեին նույնպես փորձել են անցնել Ադրբեջանի պաշտպանական գիծը». «Սակայն Ադրբեջանի զինված ուժերը կանխել են թշնամական ուժերի փորձը, երկարատեւ մարտի արդյունքում հակառակորդը զգալի կորուստներ է կրել եւ ստիպված է եղել նահանջել: 3 օր տեւած մարտերի ընթացքում ադրբեջանական բանակի 8 զինվոր է զոհվել»:
Իսկ ադրբեջանական լրատվամիջոցները վրդովված են պաշտպանական գերատեսչության նման պահվածքի առիթով:
«Ադրբեջանական հասարակությունը պաշտպանության նորաթուխ նախարար Զաքիր Հասանովից խելամիտ բացատրություն է սպասում ողբերգության մասին, որը ադրբեջանցի 11 զինվորի մահվան պատճառ է դարձել (ինչպես հաղորդում են տեղական լրատվական գործակալությունները), իսկ հնարավոր է՝ 14 զոհի (ինչպես հաղորդում են միջազգային լրատվամիջոցները՝ հղում կատարելով հայկականին): Պաշտպանության նախարարությունը համաքաղաքացիների, զինծառայողների ծնողների, ամբողջ երկրի համբերությունն է փորձում: Լռում են: Ինչո՞ւ են զոհվել այդ զինվորները: Ովքե՞ր են այդ զինվորները: Եվ ո՞վ է նրանց ուղարկել թշնամու դեմ: Ինչո՞ւ: Եվ հետո, իսկապե՞ս նրանք զինված են եղել հատուկ միջոցներով եւ իսրայելական արտադրության զենքով»,- գրում է haqqin.az.-ը:
«Ըստ ամենայնի, հարձակվել են, ամեն դեպքում, մեր զինվորները, որոնց թշնամին դիմավորել է պատասխան կրակոցներով: Ռազմական գործից թեկուզ փոքր-ինչ հասկացող ցանկացած մարդ գիտի, որ հարձակվող կողմն ավելի շատ զոհ է ունենում, քան հակառակորդի հարձակումը դիմավորողը: Երեկ հայտնի դարձավ 2 հայ զինվորի զոհվելու մասին: Այսօր հայտնեցին ադրբեջանական դասակի կեսի մահվան մասին: Մի՞թե 2 հայ Ռեմբոները կարողացել են ոչնչացնել ադրբեջանական բանակի մի ամբողջ ստորաբաժանում: Հավատալու բան չէ, այդպես չի լինում: Եվ ոչ թե այն պատճառով, որ Հայաստանում Ռեմբոներ չկան, այլ նրա համար, որ, դատելով ոչ պաշտոնական տեղեկատվությունից, զինվորները զոհվել են ոչ թե նռնակների բեկորներից, այլ թշնամու գնդակից: Այսինքն՝ մեր զինվորները դիվերսիայի կամ հակառակորդի այլ գործողության զոհ չեն դարձել: Ո՛չ, անփորձ եւ անհայտություն ուղարկված զինվորներին պարզապես սպանել են:
Եթե նրանք հետախուզական ջոկատի զինվորներ են եղել, ուրեմն այդ ի՞նչ հետախույզներ են, որ այդքան հաճախ ընկնում են անուս եւ տգետ հայ զինվորի կրակի տակ: Իսկ եթե նրանք հետախույզներ չեն, այլ ընդամենը երիտասարդ զինվորիկներ, նորակոչիկներ, ապա ո՞վ է նրանց մահվան ուղարկել: Ո՞վ է հարձակվել: Ինչո՞ւ: Թե՞ մենք պատերազմ ենք սկսում, եւ մինչեւ հիմա չգիտենք այդ մասին: Վերջերս Զաքիր Հասանովը հայտարարեց, որ ադրբեջանցի յուրաքանչյուր սպանված զինվորի փոխարեն 10 հայ զինվոր է զոհվելու: Ստացվում է, որ Հասանովի բանակը եթե ոչ այսօր, ապա վաղը 140 հայ զինվո՞ր է սպանելու»,- գրում է պարբերականը:
