Գերմանահայկական միության եւ «Լեպսիուսի տուն» հետազոտական կենտրոնի նախաձեռնությամբ Գերմանիայի Բրանդենբուրգ երկրամասի խորհրդարանի (Լանդթագ) շենքում հանդիսավոր կերպով նշվեց Գերմանահայկական միության 100-ամյա տարեդարձը:
Հրավիրված նիստին եւ տոնական արարորղությանը ներկա էին երկրամասի խորհրդարանի նախագահ Գունթեր Ֆրիչը, Սաքսոնիա-Անհալթ երկրամասի մշակույթի նախարար Շտեֆան Դորգերլոհը, Բրանդենբուրգի գիտության, հետազոտության եւ մշակույթի նախարարության պետքարտուղար (փոխնախարար) Մարտին Գորհորթը, Բրանդենբուրգի ավետարանական եկեղեցու առաջնորդը, Գերմանահայոց թեմի Հայ առաքելական եկեղեցու առաջնորդը, Բեռլինի Հումբոլդի համալսարանի ռեկտորը, ՀՀ մշակույթի նախարար Հասմիկ Պողոսյանը, ԳԴՀ-ում ՀՀ դեսպանատան խորհրդական Աշոտ Սմբատյանը, Բրանդենբուրգի խորհրդարանի պատգամավորներ, Բունդեսթագի պատգամավորներ, հասարակական, քաղաքական եւ մշակութային գործիչներ:
Միջոցառմանը ողջույնի խոսքով հանդես եկան Հասմիկ Պողոսյանը, Շտեֆան Դորգերլոհը, Մարտին Գորհորթը, Արմեն Սմբատյանը:
Մասնակիցներն իրենց ելույթներում բարձր գնահատեցին Միության առաքելությունը, ինչպես նաեւ միության պարբերականի դերը, որի միջոցով էլ հայկական շատ թեմաներ հասանելի են դառնում գերմանական հասարակութանը: Խոսվեց միության հիմնադրման տարիներին հայ ժողովրդի առջեւ ծառացած մարտահրավերների, միության հիմնադիրներ՝ Լեպսիուսի եւ Ավետիք Իսահակյանի կատարած աշխատանքների մասին:
Հասմիկ Պողոսյանը միության նախագահ, դոկտոր Րաֆֆի Կանթյանինն եւ Լեպսիուսի թոռ, դոկտոր, պրոֆեսոր Մանֆրեդ Աշքեին պարգեւատրեց ՀՀ մշակույթի նախարարության ոսկե մեդալով: